चांदूर बाजार : तालुक्यातील खराळा, खरवाडी येथे एकाच रात्री तब्बल १२ ठिकाणी चोरी करण्याचा प्रयत्न झाला. यामध्ये दोन किराणा दुकान व एका मेडिकल स्टोअरसह अनेकांच्या घरांच्या मुख्य दारांचे कुलूप फोडले. शुक्रवारी रात्री दीडच्या सुमारास गावामध्ये चोरांचा सुळसुळाट झाला. चोरांची संख्या एका पेक्षा अधिक असल्याचा प्राथमिक अंदाज आहे. मात्र, चोरीचा प्रयत्न यशस्वी होऊ शकला नाही.
चोरांचा व्हिडीओ प्रदीप ढवळे यांच्या घराला लागलेल्या सीसीटीव्ही कॅमेऱ्यात कैद झाला आहे. एकाच दिवशी अनेक ठिकाणी चोरीचे प्रकार घडल्याने पंचोक्रोशीमध्ये भीतीचे वातावरण निर्माण झाले आहे. खरवाडी येथे धान्याचे गोदाम, किराणा दुकान तसेच मंगेश बंड, किसनराव लांबट, पंकज निंभोरकर, आशिष कडू, नंदेश अंबाडकर, गजानन गोटे, वैभव भुसारी, बाळासाहेब वाकोडे तसेच खराळा येथील चौधरी यांच्या घरी चोरी करण्याचा प्रयत्न करण्यात आला.