अकोला: जिल्हा परिषदेच्या रिक्त झालेल्या शिक्षण व बांधकाम सभापती पदांचा प्रभार पंधरा दिवसांपूर्वी जिल्हा परिषद अध्यक्षांकडे सोपविण्यात आला होता; मात्र कामकाजाचा व्याप जास्त असल्याने या दोन्ही सभापती पदांचा प्रभार उपाध्यक्षांकडे सोपविण्याचे पत्र अध्यक्षांनी मुख्य कार्यकारी अधिकाऱ्यांना दिले होते, त्यानुसार जिल्हा परिषदेच्या शिक्षण व बांधकाम सभापती पदांचा प्रभार जिल्हा परिषद उपाध्यक्ष सावित्री राठोड यांच्याकडे साेपविण्यात येत असल्याचा आदेश जिल्हा परिषद मुख्य कार्यकारी अधिकारी सौरभ कटियार यांनी शुक्रवारी दिला.
गतवर्षी जानेवारी महिन्यात घेण्यात आलेल्या जिल्हा परिषद व पंचायत समित्यांच्या सार्वत्रिक निवडणुकीत देण्यात आलेले प्रवर्गनिहाय आरक्षण ५० टक्क्यापेक्षा जास्त झाल्याने नागरिकांचा मागासवर्ग प्रवर्गातून (ओबीसी) निवडून आलेल्या जिल्हा परिषद व पंचायत समित्यांच्या सदस्यांचे सदस्यत्व रद्द करुन पुन्हा निवडणूक घेण्याचा आदेश सर्वोच्च न्यायालयाने ४ मार्च रोजी दिला. त्यानुसार ओबीसी प्रवर्गातून निवडून आलेल्या जिल्हा परिषदेच्या १४ सदस्यांचे सदस्यत्व रद्द करण्यात आले असून, त्यामध्ये चंद्रशेखर पांडे गुरुजी यांच्याकडील शिक्षण व बांधकाम सभापतिपद आणि मनिषा बोर्डे यांच्याकडील महिला व बालकल्याण सभापतिपद रिक्त झाले. रिक्त झालेल्या सभापतिपदांचा अतिरिक्त प्रभार जिल्हा परिषद अध्यक्ष प्रतिभा भोजने यांच्याकडे सोपविण्यात येत असल्याचा आदेश जिल्हा परिषद मुख्य कार्यकारी अधिकारी सौरभ कटियार यांनी ९ मार्च रोजी दिला होता. त्यानुसार शिक्षण व बांधकाम आणि महिला व बालकल्याण सभापतिपदांचा अतिरिक्त प्रभार अध्यक्ष्रांनी स्वीकारला. परंतु कामकाजाचा व्याप जास्त असल्याने शिक्षण व बांधकाम सभापतिपदांचा प्रभार उपाध्यक्षांकडे देण्याचे पत्र जिल्हा परिषद अध्यक्ष प्रतिभा भोजने यांनी २५ मार्च रोजी मुख्य कार्यकारी अधिकाऱ्यांना दिले होते. त्यानुसार पंधरा दिवसांपूर्वी अध्यक्षांकडे सोपविण्यात आलेला जिल्हा परिषद शिक्षण व बांधकाम सभापती पदांचा अतिरिक्त प्रभार उपाध्यक्ष सावित्री राठोड यांच्याकडे सोपविण्यात येत असल्याचा आदेश मुख्य कार्यकारी अधिकारी सौरभ कटियार यांनी २६ मार्च रोजी दिला. त्यानुसार उपाध्यक्ष सावित्री राठोड शिक्षण व बांधकाम सभापती पदांचा प्रभार स्वीकारणार आहेत.