शेतक-यांना प्रतीक्षा अग्रीम बोनसची!

राज्यात आतापर्यंत २९ लाख क्विंटल कापसाची खरेदी; पणन महासंघाचा वाटा दोन लाख क्विंटल¯.

अकोला : राज्य शासनाने कापसाला अग्रीम बोनस देण्याची घोषणा केल्यानंतर कापूस खरेदीला वेग आला असून, आतापर्यत राज्यात २९ लाख ३0 हजार ७३४ क्विंटल कापूस शेतकर्‍यांनी व्यापारी आणि भारतीय कापूस महामंडळाला (सीसीआय) विकला आहे. यामध्ये १ लाख ९४ हजार ६५ क्विंटल कापसाचा वाटा कापूस उत्पादक सहकारी पणन महासंघाचा आहे; पण यावर्षी खासगी बाजारपेठेतील कापसाचे भाव वाढण्याची सुतराम शक्यता नसल्याने, शेतकर्‍यांचे लक्ष अग्रीम बोनसच्या अंमलबजावणीकडे लागले आहे. राज्याचे मुख्यमंत्री आणि कृषिमंत्री एकनाथ खडसे यांनी कापूस उत्पादक शेतकर्‍यांना अग्रिम बोनस देण्याबाबत सरकार अनुकूल असल्याची घोषणा केल्याने राज्यातील शेतकर्‍यांच्या आशा पल्लवित झाल्या आहेत. आतापर्यंत शेतकर्‍यांनी सीसीआय, महाराष्ट्र राज्य कापूस उत्पादक सहकारी पणन महासंघ आणि व्यापार्‍यांना कापूस विकण्याचा सपाटा लावला आहे. मागील पाच दिवसात राज्यात कापूस विक्री वाढली असून, पणन महासंघाकडेही कापसाचा ओघ सुरू झाला आहे. सुरू वातीला १0 ते २0 हजार क्विंटल खरेदी करणार्‍या पणन महासंघाकडे दोन लाख क्विंटल कापूस शेतकर्‍यांनी विकला असून, बुधवारपासून या खरेदीमध्ये दररोज ४0 ते ५0 क्विंटलची भर पडत आहे. या अगोदर कापूस एकाधिकार योजना असताना शेतकर्‍यांना पणन महासंघामार्फतच अग्रिम बोनस देण्यात येत होता; परंतु कापूस एकाधिकार योजना गुंडाळल्यानंतर अग्रिम बोनस देण्याची योजना त्याचवेळी बंद पडली. दुष्काळी स्थिती बघता यावर्षी अग्रीम बोनस देण्यासाठी राज्य शासन अनुकूल असल्याने शेतकर्‍यांना दिलासा मिळाला; पण प्रत्यक्षात पंधरा दिवसापासून या घोषणेची अंमलबजावणी झाली नसल्याने कापूस उत्पादक शेतकरी चिंतेत सापडला आहे. खासगी बाजार आणि शासकीय भाव सारखेच असल्याने राज्यातील कापूस उत्पादक शेतकर्‍यांनी पणन महासंघाला कापूस विकण्यास सुरू वात केली. हे चांगले संकेत आहेत. खासगी बाजारात कापसाचे भाव वाढतील असे वाटत नसल्याचे कापूस उत्पादक सहकारी पणन महासंघाचे अध्यक्ष डॉ. एन.पी. हिराणी यांनी सांगीतले.