लिलावासाठी पर्यावरण मूल्यांकन प्राधिकरणच्या मान्यतेची प्रतीक्षा

अकोला जिल्ह्यातील १८८ रेतीघाटांचा प्रस्ताव.

अकोला : जिल्ह्यातील १८८ रेतीघाटांचा लिलाव करण्यासाठी राज्य पर्यावरण समितीमार्फत मान्यता प्राप्त झाली असली तरी पर्यावरण मूल्यांकन प्राधिकरणाकडून मान्यता प्राप्त होणे अद्याप बाकी आहे. त्यानुषंगाने जिल्ह्यातील रेतीघाटांच्या लिलावासाठी राज्य पर्यावरण मूल्यांकन प्राधिकरणकडून केव्हा मान्यता प्राप्त होते, याबाबतची प्रतीक्षा केली जात आहे. गतवर्षी जिल्हा प्रशासनामार्फत लिलाव करण्यात आलेल्या जिल्ह्यातील रेतीघाटांची मुदत गत सप्टेंबरअखेर संपुष्टात आली. या पृष्ठभूमीवर यावर्षी जिल्ह्यातील रेतीघाटांचा लिलाव करण्यासाठी जिल्हा खनिकर्म विभागामार्फत जिल्ह्यातील १८८ रेतीघाटांचा प्रस्ताव गत सप्टेंबरमध्ये राज्य पर्यावरण समिती, राज्य पर्यावरण मूल्यांकन प्राधिकरण आणि विभागीय आयुक्त कार्यालयाकडे सादर करण्यात आला. दरम्यान, जिल्ह्यातील १८८ रेतीघाटांचा लिलाव करण्यास राज्य पर्यावरण समितीमार्फत गत २२ डिसेंबर रोजी मान्यता देण्यात आली. त्यापूर्वी १८0 रेतीघाटांच्या लिलावास विभागीय आयुक्तांकडूनही मंजुरी देण्यात आली. जिल्ह्यातील रेतीघाटांचा लिलाव करण्यास राज्य पर्यावरण समितीमार्फत मान्यता प्राप्त झाली असली तरी पर्यावरण मूल्यांकन प्राधिकरणकडून मान्यता मिळणे अद्याप बाकी आहे. प्राधिकरणाकडून मंजुरी मिळाल्यानंतर जिल्ह्यातील रेतीघाटांची लिलाव प्रक्रिया जिल्हाधिकारी कार्यालयाकडून सुरु करण्यात येणार आहे. त्यानुषंगाने जिल्ह्यातील रेतीघाटांच्या लिलावासाठी राज्य पर्यावरण मूल्यांकन प्राधिकरणकडून केव्हा मंजुरी दिली जाते, याबाबतची प्रतीक्षा केली जात आहे. जिल्ह्यातील १८८ रेतीघाटांच्या लिलावासाठी राज्य पर्यावरण समितीकडून मान्यता मिळाली आहे; मात्र राज्य पर्यावरण मूल्यांकन प्राधिकरणकडून मान्यता मिळणे अद्याप बाकी आहे. पर्यावरण मूल्यांकन प्राधिकरणकडून मान्यता मिळाल्यानंतर जिल्ह्यातील रेतीघाटांची लिलाव प्रक्रिया सुरू करण्यात येणार असल्याचे प्रभारी जिल्हा खनिकर्म अधिकारी सुनील पाटील यांनी स्पष्ट केले.