अज्ञात ट्रकची मोटारसायकला धडक ,दोघे जखमी

पातूर-बाळापूर मार्गावरील घटना.

पातूर (जि. अकोला) : पातूर-बाळापूर मार्गावरील सिंगरनाल्याजवळ २१ जूनच्या सायंकाळी ५ वाजताच्या सुमारास अज्ञात ट्रकने मोटारसायकलला धडक दिल्याने दोघे जण जखमी झाले. यातील एकजण गंभीर तर दुसरा किरकोळ जखमी आहे. तांदळी येथील रुपेश शालिग्राम डाबेराव व गजानन नाकट हे दोघेजण पातूर येथून एम.एच.३0 ए.एच.३६८१ क्रमांकाच्या मोटारसायकलने मंगळवारी सायंकाळी तांदळीकडे जात होते. सिंगरनाल्याच्या पुढे बाळापूरकडून येत असलेल्या अज्ञात ट्रकने त्यांच्या मोटारसायकलला जोरदार धडक दिली.या अपघातात गजानन नाकट यांच्या पायाला जबर मार लागला तर रुपेश डाबेराव हे किरकोळ जखमी झाले. सदर अपघातानंतर ट्रक घटनास्थळावरून पसार झाला . घटनेची माहिती मिळताच वाहतूक पोलीस बाळकृष्ण येवले,चालक सदानंद व्यवहारे यांनी जखमींना त्वरित पुढील उपचारासाठी अकोल्यास रवाना केले.हे वृत्त लिहीपर्यंत पातूर पोलिसात गुन्हा दाखल करण्यात आला नव्हता.