पश्चिम झाेनमधील गीतानगर, गंगानगर, अकाेली बु., हिंगणा परिसरात असंख्य रहिवासी इमारती डाैलाने उभ्या आहेत, तसेच काही इमारतींचे निर्माणकार्य सुरू आहे. नगररचना विभागाने मंजूर केेलेला प्रस्ताव बासनात गुंडाळून ठेवत काही बहाद्दर मालमत्ताधारक मनमानीरीत्या इमारतींचे बांधकाम करीत आहेत. यामुळे शहराच्या नियाेजनाची पुरती वाट लागत आहे. दरम्यान, गीतानगरमध्ये नावकार बिल्डरर्स अँड डेव्हलपर्सतर्फे भागीदार राजकुमार जैन यांनी नगररचना विभागाकडे ८४० चाैरस मीटर बांधकामाचा प्रस्ताव सादर केला हाेता. हा प्रस्ताव मनपाने मंजूर केल्यानंतर नियमांना धाब्यावर बसवीत इमारतीचे बांधकाम करण्यात आले. ही बाब निदर्शनास आल्यानंतर मनपाने इमारतीचे माेजमाप केले असता, मंजूर नकाशाव्यतिरिक्त तब्बल ८२१.६८ चाैरस मीटरचे अनधिकृत बांधकाम उभारल्याचे समाेर आले. शुक्रवारी पश्चिम झाेनचे क्षेत्रीय अधिकारी राजेंद्र टापरे, अतिक्रमण विभागाचे प्रवीण मिश्रा, चंद्रशेखर इंगळे यांच्यासह इतर कर्मचाऱ्यांनी इमारतीचा अनधिकृत भाग ताेडण्याला प्रारंभ केला.
साेमठाणा येथेही कारवाई
यादरम्यान, सोमठाणा रोड येथे भरतसिंग राजपूत यांच्या रेणुका डुप्‍लेक्‍समध्‍ये समोर व मागील बाजूने समास अंतर न साेडता अनधिकृत बांधकाम केल्याचे दिसून आले. यावेळी राजपूत यांच्या इमारतीवरही कारवाई करण्यात आली.