दोन वखार साहाय्यक गजाआड

तीन कोटींचा धान्य घोटाळा.

अकोला: तार फैलातील वखार महामंडळाच्या गोदामातील धान्याची परस्पर विक्री करून केंद्रीय वखार महामंडळाच्या पाच गोदामांमधील ३ कोटी रुपयांच्या वर गहू व तांदळाची संगनमत करून अफरातफर केल्याप्रकरणी रामदासपेठ पोलिसांनी दोन वखार साहाय्यकांना गुरुवारी अटक केली. आरोपींना न्यायालयात हजर केले असता, दोघाही आरोपींना ६ सप्टेंबरपर्यंत पोलीस कोठडीत ठेवण्याचे आदेश दिले. केंद्रीय वखार महामंडळाचे व्यवस्थापक दिनेशसिंह देवीप्रसादसिंह यांनी १३ मार्च २0१४ मध्ये रामदासपेठ पोलीस ठाण्यात दिलेल्या तक्रारीनुसार, महामंडळाच्या पाच गोदामांमधून वखार महामंडळाचे अधीक्षक व्यवस्थापक सीएचव्ही रमण्णाराव, पाचमोरी गोदामाचे वखार साहाय्यक जी.एल. शिंदे, वखार साहाय्यक यू.एस. ढेंगळे, वखार साहाय्यक एन.के. पाटील, वखार साहाय्यक एस.के. गुटके, धर्मकाटा कार्यवाहक आर.बी. जाधव या सर्वांनी संगनमत करून २00८ ते १२ मार्च २0१४ या कालावधीमध्ये त्यांच्या अखत्यारितील वेअर हाऊसमधून ३१५८२ गहू व तांदळाचे पोते (प्रत्येकी ५0 किलो) असे एकूण १५ लाख ७९ हजार १00 क्विंटल धान्याची अफरातफर करून शासनाची ३ कोटी ६ लाख ६२ हजार ९४१ रुपयांनी फसवणूक केली होती. या प्रकरणी रामदासपेठ पोलिसांनी फसवणुकीचा गुन्हा दाखल केला होता. तब्बल वर्षभरानंतर पोलिसांनी महामंडळाचे वखार साहाय्यक नरेश पाटील व उमेश ढेंगळे यांना गुरुवारी अटक केली.