अकोला : जिल्ह्यातील महानगरपालिका, नगरपालिका व ग्रामपंचायत क्षेत्रातील रिक्त असलेल्या ‘आपले सरकार सेवा केंद्रां’करिता पात्र ठरलेल्या ३४५ उमेदवारांची निवड करण्यात आली असून, उमेदवारांची अंतिम निवड यादी शुक्रवार, १० सप्टेंबर रोजी जिल्हाधिकारी कार्यालयाच्या संकेतस्थळावर प्रसिद्ध करण्यात आली आहे.
जिल्ह्यातील रिक्त आपले सरकार सेवा केद्रांसाठी जिल्हा सेतू समिती तथा जिल्हाधिकारी कार्यालयामार्फत इच्छुक उमेदवारांकडून अर्ज मागविण्यात आले होते. त्यामध्ये जिल्ह्यातील १ हजार ५३२ उमेदवारांकडून अर्ज प्राप्त झाले होते. जिल्हाधिकारी कार्यालयास प्राप्त झालेल्या अर्जांच्या तपासणीनंतर संबंधित उपविभागीय अधिकारी, तहसीलदार व संबंधित निवासी नायब तहसीलदारांच्या समितीने सादर केलेल्या यादीला जिल्हास्तरीय समितीने मान्यता दिली आहे. त्यामध्ये आपले सरकार सेवा केंद्र मंजुरीसाठी ८९ दिव्यांग उमेदवारांची प्राधान्याने निवड करण्यात आली, तसेच एकमेव अर्जदार असलेले ४७, एकमेव सीएससीधारक असलेले ६५ आणि मागील सहा महिन्यांच्या कालावधीत (१ सप्टेंबर २०२० ते २८ फेब्रुवारी २०२१) सीएससीचे व्यवहार जास्त असलेले १४४, अशा एकूण ३४५ उमेदवारांची ‘आपले सरकार सेवा केंद्रां’साठी निवड करण्यात आली. पात्र उमेदवारांची अंतिम निवड यादी जिल्हाधिकारी कार्यालयाच्या संकेतस्थळावर प्रसिद्ध करण्यात आली असल्याचे निवासी उपजिल्हाधिकारी तथा जिल्हा सेतू समितीचे सचिव संजय खडसे यांनी सांगितले.