अकोला : खदान पोलीस ठाण्याच्या हद्दीतील गौतमनगर येथे देशी व विदेशी दारूची मोठ्या प्रमाणात अवैधरीत्या विक्री करीत असल्याच्या माहितीवरून शहर पोलीस उपअधीक्षक सचिन कदम यांच्या विशेष पथकाने शनिवारी दुपारी छापेमारी केली. या दोन्ही ठिकाणावरून दहा हजार रुपयांचा दारूसाठा जप्त करण्यात आला असून, तीन आरोपी फरार झाले आहेत. त्यांच्याविरुद्ध खदान पोलीस ठाण्यात गुन्हा दाखल करण्यात आला आहे.
गौतमनगरातील रहिवासी प्रेम राहुल पावनमारे, संजय विक्रम पावनमारे, जय संजय पावनमारे हे देशी व विदेशी दारूची अवैधरीत्या मोठ्या प्रमाणात विक्री करीत असल्याची माहिती शहर पोलीस उपअधीक्षक सचिन कदम यांच्या विशेष पथकाला शनिवारी दुपारी मिळली. या माहितीवरून त्यांच्या पथकाने छापेमारी करून तीनही ठिकाणावरून दहा हजार रुपयांचा दारूसाठा जप्त करण्यात आला आहे. यावेळी तीनही दारू विक्रेते घटनास्थळावरून फरार होण्यात यशस्वी झाले. याप्रकरणी खदान पोलिसांनी या तिघांविरुद्ध गुन्हा दाखल केला आहे. ही कारवाई पोलीस अधीक्षक जी श्रीधर, अतिरिक्त पोलीस अधीक्षक मोनिका राऊत, शहर पोलीस उपअधीक्षक सचिन कदम यांच्या मार्गदर्शनाखाली उपअधीक्षक यांच्या विशेष पथकाने केली.