खासगी बसमध्ये नियमांचे पालन नाहीच
अकोला : कोरोनाच्या पार्श्वभूमीवर प्रवासादरम्यान मास्कचा वापर आणि फिजिकल डिस्टन्सिंगचे पालन करणे अनिवार्य करण्यात आले आहे. मात्र, शहरातून धावणाऱ्या एस.टी. महामंडळाच्या बसेससोबतच खासगी प्रवाशी बसेसमध्ये या नियमांचे पालन होताना दिसत नाही. त्यामुळे कोरोनाचा फैलाव वेगाने होण्याची शक्यता नाकारता येत नाही.
जय हिंद चौकात वाहतुकीची कोंडी
अकोला : जयहिंद चौक हा जुना शहरातील प्रमुख रस्ता आहे. याच मार्गावर शहराचे आराध्य दैवत श्री राजराजेश्वराचे मंदिर असून भाजी बाजारदेखील आहे. पार्किंगची योग्य जागा नसल्याने अनेकजण रस्त्यावरच वाहने पार्क करीत असल्याने नेहमीच वाहतुकीची कोंडी निर्माण होते. ऑटोचालकही रस्त्याच्या मध्येच वाहने उभी करीत असल्याने अनेकदा येथे किरकोळ वादही होतात.
नदीपात्रात अस्वच्छता
अकोला : शहरातील मुख्य नाले मार्णा नदीपात्रात सोडण्यात आले आहेत. त्यामुळे शहरातील बहुतांश घाण पाणी नदीपात्रात जमा होते. शिवाय, अनेक लोक नदीपात्रातच कचरा टाकत असल्याने परिसरात मोठ्या प्रमाणात अस्वच्छता पसरली आहे. त्यामुळे डासांचाही प्रादुर्भाव वाढला असून, नदीजवळील परिसरातील नागरिकांचे आरोग्य धोक्यात आले आहे.
गायगाव मार्गावर रस्त्यावर धूळ
अकोला : डाबकी रोडमार्गे गायगावकडे जाणाऱ्या मार्गाची दुरवस्था झाली असून, या मार्गावर मोठ्या प्रमाणात धुळीचे साम्राज्य झाले आहे. रेल्वे गेटवरील उड्डाणपुलाचे बांधकाम सुरू असल्याने या भागात धुळीचे प्रमाण सर्वाधिक आहे. वाहनधारकांना या धुळीचा मोठ्या प्रमाणात त्रास होतो. हा त्रास पाहता सोमवारी (दि. २२) या मार्गावर पाणी टाकण्यात आले होते.
बसस्थानकावर फिजिकल डिस्टन्सिंगचा फज्जा
अकोला : एसटी महामंडळाच्या आगार क्रमांक एक आणि मध्यवर्ती बसस्थानकावर प्रवाशांच्या संख्येत वाढ होत आहे; मात्र या ठिकाणी येणाऱ्या प्रवाशांकडून फिजिकल डिस्टन्सिंगचा फज्जा उडविण्यात येत असल्याचे चित्र दिसून येत आहे. अनेकजण विनामास्क बसमध्ये बसल्याचे दिसून येतात. त्यामुळे कोरोनाच्या फैलावाची शक्यता नाकारता येत नाही.