कुटासा येथे इसमाची हत्या

पूर्ववैमनस्यातून कुटासा येथील एका इसमाची हत्या.

दहिहंडा (जि. अकोला): पूर्ववैमनस्यातून कुटासा येथील एका इसमाची हत्या झाल्याची घटना मंगळवारी उजेडात आली. विलास बापुसा गावंडे (४0) हे मृत्युमुखी पडलेल्या इसमाचे नाव आहे. याप्रकरणी पोलिसांनी चार आरोपींना अटक केली. विलास गावंडे यांच्यावर कुर्‍हाडीने हल्ला करण्यात आला. त्यांना तातडीने अकोला येथील सर्वोपचार रुग्णालयात भरती करण्यात आले; मात्र त्यांचा मृत्यू झाला. ते शेतकरी होते. याप्रकरणी त्यांची पत्नी अनिता गावंडे यांनी दहिहंडा पोलीस ठाण्यात धाव घेऊन तक्रार नोंदविली. पोलिसांनी मनोज पूरण बागडे, पूरण सखाराम बागडे, संजय पूरण बागडे, राजयत्न उर्फ नंदू पुरण बागडे यांच्याविरुद्ध भादंविचे कलम ३0२, ३४ अन्वये गुन्हा दाखल करण्यात आला. विलास गावंडेंवर शोकाकुल वातावरणात अंतिम संस्कार करण्यात आले. एका महिलेवर वाईट नजरेने पाहणार्‍यावरून हत्याकांड घडल्याचे समजते. पोलिसांनी तपास सुरू केला आहे.