मूर्तिजापूर : तालुक्यातील माना वीज वितरण माना उपविभाकडून मान्सूनपूर्व झाडांच्या फांद्या तोडण्याचा कार्यक्रम हाती घेतला आहे. परंतु, माना सबस्टेशन अंतर्गत येत असलेल्या माना गावातील १८ मे रोजी चार महाकाय कडुलिंबाच्या झाडांची बुंध्यापासून कत्तल करण्यात आली असल्याने गावकऱ्यांनी रोष व्यक्त केला आहे.
माना सबस्टेशन अंतर्गत वीज तारांजवळ असलेल्या झाडांच्या फांद्या तोडून तारांजवळची जागा मोकळी करण्याचा कार्यक्रम चालू असताना त्यांनी तसे न करता मान्सूनपूर्व झाडांच्या फांद्या न छाटता शंभर-दोनशे वर्षांपूर्वीचे चार कडुनिंबाचे झाडे बुंध्यापासून जमीनदोस्त केली. शासन एकीकडे वृक्ष लागवडीची मोहीम युद्धपातळीवर राबवीत असताना दुसरीकडे वीज वितरण कंपनीच्या अधिकाऱ्यांकडून विनापरवाना महाकाय वृक्षांची कत्तल करण्यात येत असल्याने गावकऱ्यांनी नाराजी व्यक्त केली. यासंदर्भात माना वितरण केंद्राचे कनिष्ठ अभियंता कमलेश मस्के यांना व मूर्तिजापूर येथील उपकार्यकारी अभियंता मनोज खांडरे यांना यासंदर्भात विचारणा केली असता, आम्हाला माहिती नसल्याचे सांगत, त्यांनी कानावर हात ठेवले. वास्तविक मान्सूनपूर्व नियोजन म्हणून झाडाच्या फांद्या छाटणे अपेक्षित असताना त्यांच्याकडून संपूर्ण झाडाची कत्तल होत असल्याने माना येथील उपसरपंच मंगेश वानखडे यांनी तहसीलदार मूर्तिजापूर व पोलीस स्टेशन माना येथे वीज वितरण कंपनीच्या विरुद्ध तक्रार दाखल केली आहे. कुठलीही परवानगी न घेता झाडाची कत्तल करणे गंभीर बाब असून, या संदर्भात संबंधित अधिकाऱ्यांवर कारवाई करण्याची मागणी त्यांनी दिलेल्या तक्रारीत केली आहे.
फोटो:
मान्सूनपूर्व तयारी करताना आम्ही झाडे बुंध्यापासून तोडत नाही. केवळ झाडाच्या फांद्या छाटण्यात येतात. वृक्षांची कत्तल केली असेल तर त्याची चौकशी करू.
-मनोज खांडरे,
उपकार्यकारी अभियंता वीज वितरण कंपनी,
महावितरण कंपनीने वृक्ष तोडण्यापूर्वी ग्रामपंचायत व वनविभागाची परवानगी घेणे अपेक्षित आहे. तलाठी, मंडळ अधिकारी यांचा पंचनाम्यासह अहवाल मागवून वरिष्ठ कार्यालयात सादर करण्यात येईल.
-प्रदीप पवार
तहसीलदार, मूर्तिजापूर