कोरोना विषाणू संसर्गाचा प्रादुर्भाव वाढत असल्याच्या पार्श्वभूमीवर विभागीय आयुक्त पीयूष सिंह यांनी अमरावती विभागासाठी आदेश जारी केले. त्यामध्ये संसर्ग जास्त असलेल्या भागाला प्रतिबंधात्मक क्षेत्र घोषित करुन त्याची अंमलबजावणी करण्याचे निर्देश देण्यात आले . त्यानुसार जिल्हाधिकारी जितेंद्र पापळकर यांनी तातडीने जिल्हाधिकारी कार्यालयात संबंधित विभागाच्या अधिकाऱ्यांची आढावा बैठक घेतली. यावेळी पोलीस अधीक्षक जी. श्रीधर, अतिरिक्त पोलीस अधीक्षक मोनिका राऊत, अकोल्याचे उपविभागीय अधिकारी डॉ. निलेश अपार, उपजिल्हा निवडणूक अधिकारी मुकेश चव्हाण, उपविभागीय पोलीस अधिकारी सचिन कदम, मनपाचे वैद्यकीय अधिकारी फारुख शेख तसेच सर्व झोनल अधिकारी आदी उपस्थित होते.
अकोला महानगरपालिका क्षेत्र तसेच अकोट व मूर्तिजापूर नगरपरिषद क्षेत्र प्रतिबंधात्मक क्षेत्र घोषित करण्यात आले असून या ठिकाणी करावयाच्या उपाययोजनांची अंमलबजावणी करण्याचे निर्देश जिल्हाधिकाऱ्यांनी यावेळी दिले. प्रतिबंधात्मक क्षेत्रातील ज्या भागात रुग्ण संख्या जास्त आहे त्या भागात बॅरिगेट्स लावणे, होम आयसोलेशन मध्ये असलेल्या रुग्णांच्या हातावर शिक्के मारणे, रुग्ण घराबाहेर आढळून आल्यास त्यांच्यावर कायदेशीर कार्यवाही करणे, प्रतिबंधात्मक क्षेत्रातील परवानगी व्यतिरिक्त जी दुकाने व आस्थापना सुरू असतील त्यांच्यावर कारवाई करणे, याशिवाय प्रतिबंधात्मक क्षेत्रात रुग्णसंख्या जास्त असलेल्या भागात नमुने संकलनासाठी विशेष उपाययोजना राबवून अधिकाधिक लोकांच्या चाचण्या करण्याचे निर्देशही जिल्हाधिकारी जितेेंद्र पापळकर यांनी संबंधित विभागाच्या अधिकाऱ्यांना यावेळी दिले.