मनमानी करणा-या अधिका-यांची हकालपट्टी करा!

अकोला जिल्ह्यातील लोकप्रतिनिधींचे मुख्यमंत्र्यांना निवेदन.

अकोला: नगरसेवकांविरुद्ध द्वेषभावनेतून कारवाई करणारे सहाय्यक पोलीस अधीक्षक डॉ.प्रवीण मुंढे व व्यावसायिकांवर कारवाईचा बडगा उगारून संपूर्ण शहरात मनमानी करणार्‍या मनपा उपायुक्त दयानंद चिंचोलीकर यांची चौकशी करून तत्काळ बदली करण्याची मागणी भाजपचे ज्येष्ठ नेते आमदार भाऊसाहेब फुंडकर, आमदार गोवर्धन शर्मा, रणधीर सावरकर यांनी मुख्यमंत्री देवेंद्र फडणवीस यांच्याकडे निवेदनाद्वारे बुधवारी केली. नागपुरात भाजपच्या पदाधिकारी, नगरसेवकांनी दोन्ही अधिकार्‍यांच्या मनमानीचा पाढा मुख्यमंत्र्यांसमोर वाचला. मनपा उपायुक्त दयानंद चिंचोलीकर नगरसेवकांच्या समस्यांकडे सातत्याने दुर्लक्ष करून त्यांना अपमानास्पद वागणूक देतात. प्रभागातील समस्या कायम असल्याने नागरिकांमध्ये रोष निर्माण झाला. चिंचोलीकरांच्या वागणुकीचा सर्वच नगरसेवकांना त्रास होत असल्याने त्यांना कामकाजात सुधारणा करण्याचे निर्देश अनेकदा जिल्ह्यातील खासदार व आमदारांनी दिल्याचा मुद्दा आमदार गोवर्धन शर्मा यांनी निवेदनाद्वारे मुख्यमंत्र्यांपुढे मांडला. चिंचोलीकरांच्या वागणुकीत सुधारणा न होता, उलट त्यांनी सूडभावनेतून नगरसेवकांना त्रास देणे सुरू केले. नगरसेवकांचा सतत होणारा अपमान व शहरात मूलभूत सुविधांचा उडालेला बोजवारा लक्षात घेता, उपायुक्त चिंचोलीकर यांची तत्काळ बदली करून त्यांना त्यांच्या मूळ आस्थापनेवर पाठविण्याची मागणी लोकप्रतिनिधींनी मुख्यमंत्र्यांकडे केली.