अकोला: कामगार विरोधी धोरणाच्या निषेधार्थ सरकारी-निमसरकारी कर्मचारी आणि शिक्षक व शिक्षकेतर कर्मचारी बुधवारी संपावर गेल्याने जिल्ह्यातील विविध सरकारी आणि निमसरकारी कार्यालयांचे कामकाज ठप्प झाले. देशव्यापी संपात जिल्हाधिकारी कार्यालयासह जिल्ह्यातील सातही तहसील कार्यालयांमधील महसूल कर्मचारी आणि विविध विभागाच्या कार्यालयातील कर्मचारी सहभागी झाले होते. या संपात महसूल विभागांतर्गत जिल्ह्यातील ३६७ कर्मचारी सहभागी झाले होते. विविध विभागातील कर्मचार्यांच्या संपामुळे जिल्ह्यातील शासकीय व निमशासकीय कार्यालयांचे कामकाज ठप्प झाले होते. संपात सहभागी महसूल कर्मचारी संघटनेसह विविध कर्मचारी संघटनांच्यावतीने मागण्यांचे निवेदन जिल्हाधिकार्यांना सादर करण्यात आले. कर्मचारी संपावर असल्याने शासकीय -निमशासकीय कार्यालयांमध्ये रिकाम्या खुर्चा-टेबल दिसत होते. तसेच एरव्ही शासकीय कार्यालय परिसरात दिसणारी नागरिकांची गर्दी न दिसता, शुकशुकाट जाणवत होता.
तीन संघटना अलिप्त
शासनाच्या कामगारविरोधी धोरणाच्या निषेधार्थ पुकारण्यात आलेल्या देशव्यापी संपापासून काही संघटनांनी अलिप्त राहण्याचे धोरण स्वीकारले होते. यामध्ये महाराष्ट्र राज्य जिल्हा परिषद कर्मचारी युनियन, कास्ट्राईब कर्मचारी महासंघ, विदर्भ लघुवेतन सरकारी कर्मचारी संघ या तीन संघटनांचा सहभाग आहे.
बँकांचे व्यवहार ठप्प
शासनाच्या कामगारविरोधी धोरणाच्या निषेधार्थ बँकांच्या एआयबीओए, एईबीओ, इंटक आणि बीईएफओ या चार संघटनादेखील सहभागी झाल्याने राष्ट्रीयीकृत बँका बंद होत्या. परिणामी बुधवारी बँकेचे सर्वच व्यवहार ठप्प पडले होते. असे असले तरी एटीएम सुविधा सुरू असल्याने काही प्रमाणात नागरिकांना दिलासा मिळाला.
आंदोलनात कृषी विद्यापीठ शिक्षकेतर कर्मचारी समन्वय समितीचाही सहभाग
केंद्रीय कर्मचारी व राज्य सरकारी कर्मचारी मध्यवर्ती संघटना, शिक्षक-शिक्षकेतर कर्मचारी यांनी शासनाकडे प्रलंबित मागण्यांसाठी २ सप्टेंबर रोजी लाक्षणिक संप पुकारला होता. या संपाला राज्य कर्मचारी मध्यवर्ती संघटनेशी संलग्नित कृषी विद्यापीठ शिक्षकेतर कर्मचारी समन्वय समितीने पाठिंबा दिला व समितीचे अध्यक्ष संतोष राऊत यांचे नेतृत्वात राष्ट्रीय महामार्गावरील विद्यापीठाच्या मुख्य प्रवेशद्वाराजवळ निदर्शने केली.