अपघातग्रस्त ट्रकवर दुचाकी आदळल्याने चालक ठार

मुर्तिजापूर तालुक्यातील घटना; तीन जखमी.

मूर्तिजापूर (जि. अकोला): अपघातग्रस्त ट्रकवर दुचाकी आदळल्याने चालक ठार झाल्याची घटना राष्ट्रीय महामार्गावरील सोनोरीनजीकच्या अरुंद पुलावर मंगळवारी सकाळी घडली. या अपघातात बुलडाणा जिल्ह्यातील उंद्री येथील संतोष परशुराम खेडवान (४५) हे मृत्युमुखी पडले. अलीकडच्या काळात राष्ट्रीय महार्मगावर अपघातांचे प्रमाण वाढले आहे. अमरावतीकडून अकोलाकडे जाणारा डब्ल्यूबी ३३ डी ३५४७ जाणार्‍या व समोरून येणार्‍या एमएच १६ ई १४२९ या ट्रकमध्ये धडक झाली. अपघातामध्ये चालक बाशीर अली करीम अली (रा. वसीरघाट , कोलकाता) आणि प्रवीण काशीराम महालकर (रा. अहमदनगर) हे जखमी झाले. यावेळी अकोलाकडून येणार्‍या एमएच २८ एके -२२२७ ही दुचाकी ट्रकवर आदळली. ट्रकचालकाने अचानक ब्रेक दाबल्याने दुचाकीस्वाराचे नियंत्रण सुटले. त्यामुळे दुचाकीस्वार संतोष परशुराम खेडवान हे जागीच ठार झाले, तर मागे बसलेले संतोष आटोळे हे जखमी झाले. अपघातामध्ये दोन्ही ट्रकचे नुकसान झाले. चालक ट्रकच्या केबिनमध्ये फसला होता. याप्रकरणी हेडकॉन्स्टेबल श्रीकांत बोरोकार यांनी दिलेल्या फिर्यादीनुसार, मूर्तिजापूर पोलिसांनी ट्रकचालकांविरुद्ध गुन्हा दाखल केला.