विकास कामांच्या ठरावाचे घोडे अडले बांधकाम विभागात!

महापौरांची स्वाक्षरी झाली; प्रशासकीय मंजुरीची प्रतीक्षा.

अकोला : नागरी दलित वस्ती सुधार योजना, सुवर्ण जयंती नगरोत्थान योजनेसह दलितेतर व मूलभूत सुविधांसाठी प्राप्त कोट्यवधी रुपयांच्या विकास कामांच्या ठरावावर महापौर उज्ज्वला देशमुख यांनी दोन दिवसांपूर्वी स्वाक्षरी केली. स्वाक्षरी केल्यानंतर प्रशासनाने प्रस्ताव जिल्हाधिकार्‍यांकडे पाठविणे अपेक्षित होते. तूर्तास ठरावाचे घोडे बांधकाम विभागात अडल्यामुळे विकास कामांना कधी सुरुवात होईल, असा प्रश्न उपस्थित झाला आहे. शहरातील विकास कामांसाठी महापालिकेला नागरी दलित वस्ती सुधार योजनेंतर्गत ३ कोटी ९५ लाख रुपये प्राप्त झाले. यापूर्वी ७ कोटी रुपये मिळाले होते. सुवर्ण जयंती नगरोत्थान योजनेंतर्गत २ कोटी ५0 लाख रुपये, दलितेतर योजनेंतर्गत ३ कोटी २३ लाख तसेच मूलभूत सुविधांसाठी २ कोटी ४0 लाख रुपयांचा निधी प्राप्त झाला. २ सप्टेंबरच्या सर्वसाधारण सभेत संबंधित योजनांसाठी प्राप्त निधीच्या कामाला मंजुरी देण्यात आली. या निधीतून शहरामध्ये विकास कामे प्रस्तावित करण्याची सूचना प्रशासनाने सर्वपक्षीय नगरसेवकांना केली होती. त्यानुषंगाने नगरसेवकांनी प्रभागात सिमेंट व डांबरी रस्ते, नाल्या, पथदिव्यांसाठी खांब, पेव्हर ब्लॉक, शौचालये तसेच सभागृह उभारण्याच्या कामाचे प्रस्ताव बांधकाम विभागाकडे सादर केले. प्राप्त प्रस्तावांची छाननी करून त्यामधून अवाजवी कामे बाजूला सारण्याचे आयुक्त अजय लहाने यांचे स्पष्ट निर्देश होते. त्यानुषंगाने बांधकाम विभागाने प्रस्ताव तयार केले. यादरम्यान, संबंधित विकास कामांच्या ठरावावर महापौरांची स्वाक्षरी न झाल्यामुळे कामे रेंगाळल्याचा सूर प्रशासकीय वतरुळात उमटत होता. दोन दिवसांपूर्वी महापौर उज्ज्वला देशमुख यांनी संबंधित ठरावावर स्वाक्षरी करीत बांधकाम विभागाकडे पाठवून दिले. आता मात्र दोन दिवसांपासून सदर ठराव व प्रस्ताव या विभागात पडून आहे.