तक्रारी, सूचना, अपेक्षा अन् मदतीची आशा!

केंद्रीय पथकाचा बुलडाणा जिल्ह्यात दुष्काळ दौरा.

बुलडाणा : दूष्काळाचे चटके सहन करीत असलेल्या बुलडाण्याला सर्वप्रथम नजर आणेवारीने हुलकावणी दिली, सुधारित आणेवारीत दूष्काळाचे चित्र स्पष्ट झाल्याने शेतकर्‍यांना मदत मिळेल अशी आशा निर्माण झाली. त्याच आशेतून शुक्रवारी दुष्काळाची पाहणी करण्यासाठी आलेल्या केंद्राच्या पथकावर बुलडाणा जिल्ह्यातील शेतकर्‍यांनी शुक्रवारी सुचना, अपेक्षा, तक्रारींचा पाऊस पडला. शेतकर्‍यांनी आपल्या मनातील शल्य यानिमित्ताने केंद्रीय पथकासमोर मांडल्याने या पथकाच्या अहवालानंतर ठोस मदत मिळेल अशी आशा जिल्हावासियांना लागली आहे. दूष्काळाची पाहणी करण्यासाठी केंद्रीय पथक शुक्रवारी जिल्ह्यात दाखल झाले. सकाळी साडे दहा वाजतापासून त्यांनी सिंदखेडराजा येथून शेती व पिकांची पाहणी करीत शेतकर्‍यांशी संवाद साधला. दुष्काळाची प्रातिनिधीक स्वरूपात पाहणी झाली. आता या पथकाच्या अहवालानंतर केंद्राच्या मदतीचे निकष ठरणार असल्याने शेतकर्‍यांना मदतीची प्रतिक्षा लागून आहे. राज्यातील दुष्काळी स्थिती पाहता केंद्राची चार पथके राज्यात आली असून त्यातील एका पथकाने शुक्रवारी बुलडाणा जिल्ह्याची पाहणी केली. या पथकाचे प्रमुख के नारायण रेड्डी यांच्यासह जगदीश कुमार, अशोक आत्राम यांचा समावेश होता. या पथकाने शेतकर्‍यांशी संवाद साधला. शेती व पिकांची पाहणी करून, संकटाचा सामना करा, असा सल्लाही त्यांनी शेतकर्‍यांना दिला. धीर धरा, आत्महत्या हा मार्ग नाही! मोहेगाव येथील महिलांनी पाहणी पथकातील प्रमुख के. नारायण रेड्डी यांची भेट घेवून आपल्या व्यथा मांडल्या.पेरणीसाठी बँकांकडून व सावकाराकडून घेतलेले कर्ज फिटत नाही. मुला-मुलींच्या लग्नाचा प्रश्न आहे. घरातील कर्ते पुरूष आत्महत्येसारखा मार्ग निवडत आहेत. मागील वर्षीच्या दुष्काळाची मदतही मिळाली नाही. बँकाचे हप्ते थकले आहेत. अशावेळी कसं जगावं, अशी कैफीयत या महिलांनी मांडली. रेड्डी यांनी महिलांची ही व्यथा गांभीर्याने ऐकून घेतली. हे नैसर्गीक संकट आहे. या संकटापुढे कोणाचेही काही चालत नाही. आलेल्या संकटांना धैर्याने तोंड द्या, आत्महत्या हा पर्याय होऊ शकत नाही. आम्ही तुमच्या भावना सरकारला कळवू. डगमगून जावू नका, सरकार तुमच्या पाठीशी आहे, असा धीर पथकातील अधिकार्‍यांनी दिला.