महाविद्यालयीन तरुण, तरुणीचा आत्महत्येचा प्रयत्न

प्रकृती अत्यवस्थ असल्याने उपचारार्थ शेगाव येथून अकोला येथे हलविले.

संग्रामपूर (बुलडाणा) : संग्रामपूर तालुक्यातील निरोड येथे महाविद्यालयीन तरूण, तरूणीने वीष प्राशन करून आत्महत्येचा प्रयत्न केल्याची घटना १0 डिसेंबर रोजी घडली. निरोड येथील अक्षय देशमुख (वय १९) हा वरवट बकाल येथील कला वाणिज्य महाविद्यालयात बी.ए. प्रथम वर्षाला, तर आकोली येथील मनिषा महादेव तुंबडे (वय १८) ही संग्रामपूर येथील संत गुलाबबाबा विद्यालयात इयत्ता १२ वीत शिकते. या दोघांचेही गाव वरवट बकाल ते जळगाव जा.रस्त्यावर आहे. १0 डिसेंबर रोजी अक्षय देशमुख व मनीषा तुंबडे हे दोघे अक्षय देशमुख याच्या निरोड शिवारातील शेतात असलेल्या हनुमान मंदिराच्या मागे वीष प्राशन केलेल्या अवस्थेत आढळून आले. दोघांनाही तातडीने वरवट बकाल येथील ग्रामीण रूग्णालयात भरती करण्यात आले. येथे प्रथमोपचार करून त्यांना शेगाव येथे हलविण्यात आले; मात्र प्रकृती अत्यवस्थ असल्याने त्यांना शेगाव येथून अकोला येथे उपचारासाठी नेण्यात आले.