खासगी शाळेत शिक्षक पदावर नियुक्तीसाठी द्यावी लागेल सीईटी परीक्षा

राज्य परीक्षा परिषदेने उपसंचालकांना मागितला रिक्त पदांचा अहवाल.

खामगाव (जि. बुलडाणा) : खाजगी शाळांमधील शिक्षक व शिक्षकेत्तर कर्मचार्‍यांची भरती शासनाकडून महाराष्ट्र राज्य परीक्षा परिषदेमार्फत करण्यात येणार आहे. यासाठी केंद्रिय निवड परीक्षा (सीईटी) द्यावी लागणार आहे. या पदभरतीची प्रक्रिया सुरु झाली असून रिक्त पदांची माहिती १५ सप्टेंबरपर्यत महाराष्ट्र राज्य परीक्षा परिषदेने १५ सप्टेंबरपर्यत शिक्षण उपसंचालक कार्यालयांकडून मागविली आहे. शासकीय अधिकार्‍यांना केआरऐव्दारे आश्‍वासनांची पूर्तता करण्यासाठी शासनाने कृती कार्यक्रम आखून दिला आहे. या कृती कार्यक्रमानुसार यापुढे खाजगी शाळांमधील शिक्षक व शिक्षकेत्तर कर्मचारी यांची शासनामार्फत करण्यात येणार असून पदभरती ही केंद्रीय निवड परीक्षेव्दारे होणार आहे. ही परीक्षा घेवून पदभरतीची जबाबदारी शासनाने महाराष्ट्र राज्य परीक्षा परीषदेवर सोपविली आहे. त्यानुसार जाहिरातीव्दारे ऑनलाईन अर्ज मागविणे, प्रश्नपत्रिका तयार करणे, लेखी परीक्षा घेणे, पेपर तपासणी, मुलाखती व निकाल जाहीर करावा लागणार आहे. ही सर्व कामे विहित मुदतीत पूर्ण करावी लागणार असून शासनाच्या १४ ऑगस्ट रोजीचे पत्रानुसार खाजगी संस्थांव्दारे चालविण्यात येणार्‍या अनुदानित व विनाअनुदानित प्राथमिक, माध्यमिक व उच्च माध्यमिक शाळांतील शिक्षक व शिक्षकेत्तर कर्मचारी यांच्या रिक्त पदांची माहिती या कार्यालयास १५ सप्टेंबर पर्यंंत शिक्षण संचालक कार्यालयाकडून मागविण्यात आली आहे. ही माहिती सादर करताना शासनमान्य अनुदानित व विनाअनुदानित पदे विचारात घ्यावी लागणार आहे. या पदांमधील रिक्त पदे भरताना शासनाने विहित केलेली पटसंख्या, आरक्षण व इतर निकष विचारात घ्यावे लागणार आहेत. अतिरिक्त शिक्षकांचाही विचार करण्यात येणार आहे. जेणेकरुन अनावश्यक पदभरती होणार नाही याची दक्षता घ्यावी लागणार आहे.