‘बीएसएनएल‘च्या केबलचा रस्ते विकासात अडथळा!

सिव्हिल लाइन मार्गाचे काम सुरू

अकोला : शहरातील सहा प्रमुख मार्गांच्या सिमेंट काँक्रिटीकरणाला रविवारपासून सुरुवात झाली. सिव्हिल लाइन मार्गावर कंत्राटदार कंपनीने रस्ता रुंदीकरणाच्या दृष्टीने खोदकाम सुरू केले असले तरी या कामात भारत दूरसंचार निगम लिमिटेडच्या (बीएसएनएल) भूमिगत केबलचा अडथळा निर्माण झाला आहे. अतवृष्टीमुळे शहरातील रस्त्यांची स्थिती वाईट झाली होती. या रस्त्यांच्या दुरुस्तीसाठी १५ कोटी रुपयांचा निधी मिळाला होता. यात १८ रस्त्यांचा समावेश होता. यापैकी १२ रस्त्यांचे डांबरीकरण आणि ६ रस्त्यांचे काँक्रिटीकरण करण्यात येणार होते. यात टॉवर ते रतनलाल प्लॉट चौक, अग्रसेन चौक ते दुर्गा चौकासह इतर चार मार्गांंचा समावेश आहे. त्यापैकी मुख्य डाक घर ते सिव्हिल लाइन चौकापर्यंतच्या मार्गावर ७५0 मीटरची लांबी आणि ७.५ मीटर रुंदीचे काम केले जाणार आहे. या रस्त्याचे काम सुरू झाल्यानंतर पहिल्याच दिवशी रस्त्याच्या खोदकामात दीड फुटावरच बीएसएनएलचे केबल असल्याने ते बाहेर आले. त्यामुळे कामात अडथळा निर्माण झाला. भूमिगत केबल किमान १ मीटर खोल टाकणे आवश्यक असते. रस्त्याच्या खोदकामात ते १.५ फुटावरच टाकण्यात आले असल्याचे आढळून आले. याबाबत महापालिका प्रशासन आणि रस्त्याचे काम करीत असलेल्या कंत्राटदार कंपनीने बीएसएनएलच्या वरिष्ठ अधिकार्‍यांना सूचना दिली असून ते याबाबत कोणती कारवाई करतात याकडे लक्ष लागले आहे.