अकोला - बनावट दस्तऐवजाच्या आधारे बोगस सिमकार्डची विक्री करणार्‍या दोघांना रामदासपेठ पोलिसांनी शनिवारी अटक केली. हे दोन्ही युवक शेगाव येथील रहिवासी असून, त्यांना शिवाजी महाविद्यालयासमोर सिमकार्डची विक्री करताना रंगेहाथ अटक केली. शिवाजी महाविद्यालयासमोर शेगाव येथील मोहम्मद नाजीम वलीम मोहम्मद, शेख रशीद शेख रउफ हे बोगस सिमकार्डची विक्री करीत असल्याची माहिती पोलिसांना मिळाली. यावरून रामदासपेठ पोलिसांनी घटनास्थळ गाठून सिमकार्ड विक्रेत्यांची झाडझडती घेतली. यामध्ये दोन्ही युवक सिमकार्ड विक्री करताना दस्तऐवजांवर खरेदीदारांऐवजी स्वत:च स्वाक्षरी करीत असल्याचे दिसून आले. यामध्ये या दोन्ही युवकांनी गंगुबाई व अमीना या दोन महिलांच्या नावावर खासगी कंपनीचे अनेक सिमकार्ड विक्री केल्याचे समोर आले. रामदासपेठ पोलिसांनी या दोन्ही युवकांना ताब्यात घेऊन त्यांची चौकशी केली असता त्यांनी बोगस सिमकार्डची विक्री केल्याची कबुली पोलिसांसमोर दिली. यावरून रामदासपेठ पोलीस ठाण्यातील अंबादास खांडवाय यांनी दिलेल्या तक्रारीवरून मोहम्मद नाजीम वलीम मोहम्मद, शेख रशीद शेख रउफ या दोघांविरुद्ध भारतीय दंड विधानाच्या कलम ४६७ (बोगस दस्तऐवज तयार करणे), ४७0 (बोगस दस्तऐवज खरे असल्याचे भासविणे), ४७१ (बोगस दस्तऐवज कामात आणणे) यानुसार गुन्हा दाखल करण्यात आला आहे. दोन्ही आरोपींना अटक करून शनिवारी न्यायालयासमोर हजर केले असता न्यायालयाने त्यांना जामीन मंजूर केला. या दोन्ही युवकांनी सिमकार्ड विक्रीचा केलेला हा आटापिटा केवळ उद्दिष्टपूर्तीसाठी असल्याची माहिती पोलिसांसमोर आली.
*तिसरा आरोपी लवकरच अडकणार लग्नाच्या बेडीत!
बोगस सिमकार्ड विक्री प्रकरणातील तिसरा आरोपी फिरोज खान अहमद अली खान हा लवकरच लग्नाच्या बेडीत अडकणार असल्याची माहिती समोर आली. रामदासपेठ पोलिसांनी कारवाई केली, त्यावेळी या प्रकरणात दोनच आरोपी होते. मात्र, अधिक चौकशी केल्यानंतर या प्रकरणातील तिसरा आरोपी फिरोज खान याचे नाव समोर आले. त्याचे या आठवड्यात लग्न असल्याने पोलिसांनी अटकेची कारवाई टाळल्याची माहिती आहे. फिरोज खान हा कंपनीचा सिमकार्ड वितरक असून, तो अकोल्यासह वाशिम व बुलडाणा येथेही सिमकार्डची विक्री करीत असल्याची माहिती आहे.