बोगस बीटीचे पाकीट तीनशे रुपयात !

विदर्भातील शेतकर्‍यांची फसवणूक

अकोला : तणनाशक तंत्रज्ञान असल्याचे भासवून विदर्भात सर्रासपणे बोगस बीटी कापसाचे बियाणे शेतकर्‍यांच्या माथी मारले जात आहे. पावसाच्या अनिश्‍चिततेमुळे शेतकर्‍यांचा कल कापूस पिकाकडे वाढला आहे. याचाच गैरफायदा बोगस बीटी बियाणे विक्री करणारे घेत आहेत. एका नामांकि त बीटी कापूस कंपनीने बोंडअळीला प्रतिबंधक जिन्ससोबतच बीटी बियाण्यांमध्ये तनणाशकाचे तंत्रज्ञान टाकले असून, लवकरच हे तंत्रज्ञान बाजारात येणार आहे. हे बियाणे बाजारात येण्याअगोदरच विक्रेत्यांनी तीनशे रू पयात बोगस बीटी विकण्याचा सपाटा लावला आहे. गत वर्षी विदर्भातील कापसाचे क्षेत्र सोयाबीनने घेतले होते; मात्र कापसाचे एकरी १0 ते १२ क्विंटलचे उत्पादन झाल्याने, या खरीप हंगामात कापसाचा पेरा वाढणार आहे. चांगल्या व भरघोस उत्पादनासाठी शेतकर्‍यांनी बीटी कापसाचे बियाणे खरेदी करणे सुरू केले आहे. परंतु आरआर, राऊंडअप बीटी, तणावरची बीटी, वीडगार्ड बीटी असे अनेक बोगस व बेकायदेशीर बीटी कापसाचे बियाणे बाजारात विकले जात आहे. या बियाण्यामध्ये बोंडअळीला प्रतिबंध जिन्स असून, ते तणनाशक असल्याचे शेतकर्‍यांना पटवून दिले जात आहे. त्यामुळे शेतकरी या बीटीला बळी पडत आहे. हे बियाणे अधिकृत नसून, ते विकण्याची शासनाने परवानगी दिलेली नाही. या बियाण्यांच्या पाकिटावर कोणत्याही प्रकारचे तंत्रज्ञान, वाण तसेच कोणत्या क्षेत्रासाठी शिफारस केलेली आहे, याचा उल्लेख नाही. असे असताना या बिटीची विदर्भात सर्रास विक्री सुरू आहे. कृषी विभागाने काही विक्रेत्यांवर थातूर मातूर कारवाई केली; मात्र बियाण्याची विक्री मोठय़ा प्रमाणात सुरू असल्याने कारवाईदेखील मोठय़ा प्रमाणात करण्याची गरज आहे. अमरवती येथील कृषी सहसंचालक अशोक लोखंडे यांनी याप्रकरणी काही विक्रेत्यांवर कारवाई केली असल्याचे सांगीतले. शेतकर्‍यांनी बियाणे खरेदी करताना पक्के बिल न चुकता घेण्याचे अवाहन केले.