मनोज भिवगडे / अकोला : विधान परिषदेच्या स्थानिक स्वराज्य संस्था निवडणुकीची घोषणा येत्या आठवड्यात कोणत्याही क्षणी होऊ शकते. त्या दृष्टीने राजकीय पक्षांनी तयारी सुरू केली असली तरी राज्यात सत्तेत असलेल्या भारतीय जनता पक्ष व शिवसेनेला अद्याप युतीबाबत निर्णय घेता आला नाही. शेवटच्या क्षणी युती होण्याची अपेक्षा करीत असलेल्या उमेदवारांचे लक्ष पक्षश्रेष्ठींच्या निर्णयाकडे लागले आहे. अकोला-वाशिम-बुलडाणा मतदारसंघाची निवडणूक यावेळी चांगलीच प्रतिष्ठेची होत आहे. काँग्रेस आणि राष्ट्रवादी काँग्रेसने आघाडी जाहीर करून इतर पक्षांच्या तुलनेत एक पाऊल पुढे टाकले आहे. दुसरीकडे शिवसेना आणि भाजपचे उमेदवार निश्‍चित मानले जात असताना या पक्षाच्या युतीचे मात्र भिजत घोंगडे आहे. निवडणूक जाहीर होण्याची तारीख जवळ आली आहे. २५ नोव्हेंबरपर्यंंत कोणत्याही क्षणी निवडणुकीची घोषणा होऊ शकते. असे असतानाही युतीच जाहीर झाली नसल्याने इच्छुक उमेदवारांचे लक्ष पक्षश्रेष्ठींच्या निर्णयाकडे लागले आहे. या मतदारसंघात गत दोन वेळा शिवसेनेने बाजी मारली आहे. आता तिसर्‍यांदा शिवसेनेचे उमेदवार गोपीकिशन बाजोरिया रिंगणात उतरण्याच्या तयारीत आहेत. त्यांना तूर्तास तरी मित्रपक्ष भाजपसोबत युती होण्याचा विश्‍वास आहे. त्यामुळेच त्यांनी नगरपालिका पिंजून काढत नगरसेवकांच्या भेटी सुरू केल्या आहेत. युतीची चर्चा सुरू असतानाच भाजपनेही या निवडणुकीची तयारी सुरू केली आहे. भाजपतर्फे वसंतराव खंडेलवाल यांचे नाव आघाडीवर असून, त्यांनी नगरसेवकांच्या गाठीभेटी सुरू केल्या आहेत. युती झाली तर या मतदारसंघात शिवसेनेला तिसर्‍यांदा संधी मिळणार, हे निश्‍चित आहे. अन्यथा दोन्ही पक्षांचे उमेदवार एकमेकांच्या विरोधात लढतील.
*भारिपची भूमिका ठरणार महत्त्वाची
आर्थिक निकषांवर या मतदारसंघाची निवडणूक लढविली जाते. त्यामुळे पक्षाचे मतदार त्यांच्या उमेदवाराच्या पाठीशी ठाम उभे राहतील, अशी शक्यता कमी असल्याने तिन्ही जिल्ह्यात ५९ मतं असलेल्या भारिप-बहुजन महासंघाची भूमिका महत्त्वाची ठरणार आहे.