नागरिकांच्या सतर्कतेने गुरे चोरीचा प्रयत्न फसला!

योगेश्वर कॉलनीमध्ये रस्त्यावर २० ते २५ जनावरे बसलेली होती. पहाटेच्या सुमारास एक पांढऱ्या रंगाच्या इंडिका कारमधून तीन व्यक्ती आल्या. त्यांनी काही जनावरांना बळजबरीने गाडीत कोंबण्याचा प्रयत्न केला. हा प्रकार मॉर्निंग वॉकला जाणाऱ्या नागरिकांच्या नजरेस पडला. त्यांनी चोरट्यांना आवाज देताच, त्यांचे गाडीवरील नियंत्रण सुटले आणि गाडी रस्त्याच्या कडेला जाऊन फसली. त्यामुळे चोरट्यांनी गाडी जागेवरच सोडून पळ काढला. तेल्हारा पोलिसांनी घटनास्थळी पोहोचून गाडी ताब्यात घेतली. फसलेल्या गाडीला काढण्यासाठी पोलिसांना शर्तीचे प्रयत्न करावे लागले. सदर गाडीला दोन नंबर प्लेट असल्याने तपासकामात अधिक डोकेदुखी होणार असल्याने पोलिसांचा ताण वाढला. पोलिसांना मनसुख ताडे, सौरभ विखे, हर्षल विखे, बिहाडे, बाळूभाऊ डोंगरे, नितीन कुलकर्णी, प्रशांत भागवत यांनी सहकार्य केले.