अकोला : एमआयडीसी पोलीस ठाण्याच्या हद्दीतील शिवनी परिसरात असलेल्या बहुजन नगरमध्ये हातात धारदार शस्त्र घेऊन सार्वजनिक ठिकाणी येणाऱ्या जाणाऱ्या नागरिकांना धमकावणाऱ्या एका आरोपीस शहर पोलीस उपअधीक्षक सचिन कदम यांच्या विशेष पथकाने अटक केली. त्याच्याविरुद्ध गुन्हा दाखल करण्यात आला आहे.
बहुजन नगर येथील मटन मार्केट जवळ शेख अनिस शेख नजीर वय ३३ वर्ष हा त्याच्या हातात तलवार घेऊन येणाऱ्या जाणाऱ्या नागरिकांना धमकावत होता, तसेच सार्वजनिक ठिकाणी अश्लील शिवीगाळ करीत दहशत पसरवीत असल्याची माहिती शहर पोलीस उपअधीक्षक सचिन कदम यांच्या विशेष पथकाला मिळाली. या माहितीवरून त्यांच्या पथकाने तातडीने एमआयडीसी परिसरात धाव घेऊन आरोपीस ताब्यात घेतले. त्याच्याकडून एक धारदार शस्त्र जप्त करण्यात आले आहे. या प्रकरणी आरोपीविरुद्ध एमआयडीसी पोलीस ठाण्यात गुन्हा दाखल करण्यात आला आहे. ही कारवाई पोलीस उपअधीक्षक सचिन कदम यांच्या विशेष पथकाने केली.