संतोष येलकर /अकोला : श्रावण महिन्यातील शेवटचा सोमवार, 2 सप्टेंबर रोजी सकाळी अकोला शहरात "जय भोले " चा जयघोष करीत, पालखी - कावड यात्रेला जल्लोषात सुरुवात झाली.
शहरातील अकोट फैल येथून पालखी व कावडयात्रा सोहळयाला सुरुवात झाली असून, कावड यात्रा मार्गांवर शिवभक्त भाविकांची गर्दी उसळली आहे. गांधीग्राम येथून पूर्णा नदीचे पवित्र जल घेऊन आलेल्या कावड - पालखी मंडळानी कावड यात्रेत सहभाग घेतला आहे. अकोट फैल येथून सुरु झालेल्या कावड यात्रेत " हर हर महादेव..., जय भोले..." अशा जयघोषाने श्री राजराजेश्वर नगरी दुमदुमली आहे.
कावड यात्रा सोहळ्याच्या निमित्ताने कवड्यात्रा मार्गांवर कावड - पालखी मंडळाचे पदाधिकारी, कावडधारी आणि जिल्ह्यातील शिवभक्त भाविकांची गर्दी उसळली आहे. कावड - पालखी मार्गांवरून मार्गक्रमण करीत, शिवभक्त भाविकांकडून अकोला शहराचे आराध्य दैवत श्री राजराजेश्वर मंदिरात जलाभिषेक करण्यात येत आहे. पावसातही जल्लोष अन उत्साहाचे वातावरण!कावड - पालखी सोहळा दरम्यान सकाळी 11. 15 ते दुपारी 12.30 वाजेपर्यंत अकोल्यात जोरदार पाऊस बरसला. बारसणाऱ्या जोरदार पावसातही कावड यात्रेत जल्लोष आणि शिवभक्तांमध्ये उत्साहाचे वातावरण असल्याचे दिसत आहे.