अकोला : व्यावसायिक वापरणासाठी असलेल्या विद्युत जोडणीच्या मीटरमध्ये तांत्रिक बदल करून तब्बल ९0६५0 रुपयांची वीजचोरी करणार्‍या येथील दोन व्यापार्‍यांवर महावितरणच्या अकोला येथील भरारी पथकाने गुरुवारी कारवाई केली. स्थानिक दाना बाजार फीडर अंतर्गत येणार्‍या परिसरात वीजचोरी होत असल्याची माहिती महावितरणच्या अकोला येथील भरारी पथकास मिळाली होती. या माहितीच्या आधारावर, भरारी पथकाने दोन दिवसांपासून या परिसरात शोध मोहिम राबविली. गुरुवारी दोन व्यापारी प्रतिष्ठानांमधील विद्युत मीटरची तपासणी केली असता, तेथे वीजचोरी होत असल्याचे महावितरणच्या पथकातील अधिकार्‍यांच्या लक्षात आले. तपास केल्यानंतर मीटरमध्ये तांत्रिक बदल करून मेसर्स अमृत स्टोर्स (वीज वापरकर्ता मन्सूर अली वाघ) यांच्याकडे ४२,६२0 रुपयांची वीजचोरी झाल्याचे उघडकीस आले. तसेच हाजी मुसा अयूब (वीज वापरकर्ता दीपक छगनलाल मकवान) यांच्याकडे ४७६३0 रुपयांची वीजचोरी झाल्याचे आढळून आले. एकूण ९0२५0 रुपयांची वीजचोरी या कारवाईदरम्यान पकडण्यात आल्याची माहिती महावितरणच्या अधिकार्‍यांनी दिली. या व्यापार्‍यांकडून होत असलेल्या वीजचोरीची रक्कम दंडासह वसूल केली जाणार आहे. व्यापार्‍यांनी दंडासह रक्कम न भरल्यास पोलीस कारवाई केली जाणार असल्याची माहिती महाविरणच्या अधिकार्‍यांनी दिली.
*आकोटमध्येही कारवाई
अकोला मंडळाअंतर्गत येणार्‍या आकोट उपविभागातही महावितरण आणि भरारी पथकाने वीजचोरीचे प्रकार शोधण्यासाठी मोहीम राबविली. आकोटमध्ये वीजचोरी करणार्‍या ग्राहकांविरुद्ध कारवाई केल्याची माहिती आहे. मात्र,याबाबतचे तपशील रात्री उशिरापर्यंंत महावितरणतर्फे देण्यात आले नाही.
*दोन दिवसांपासून शोध मोहीम
अकोला मंडळाअंतर्गत वीजचोरीचे प्रकार रोखण्यासाठी महावितरणचे अधिकारी आणि भरारी पथकाने संयुक्त मोहीम राबविली आहे. दोन दिवसांपासून शहरात ही धडक मोहीम राबविली जात आहे. शहरातील सर्वच परिसरात वीजचोरीचे प्रकार शोधण्यासाठी ही मोहीम आणखी काही दिवस राबविली जाणार आहे. आतापर्यंंत ८0 पेक्षा अधिक वीज ग्राहकांची तपासणी करण्यात आली. त्यापैकी १0 ठिकाणी वीजचोरी होत असल्याचे आढळून आले.