दुचाकी ट्रेलरवर आदळून दोन जागीच ठार

मिरजगाव : नगर-सोलापूर महामार्गावर मिरजगाव नजीकच्या बेलगाव चौकात मोटारसायकल ट्रॅक्टरच्या ट्रेलरवर पाठीमागून आदळून झालेल्या अपघातात मोटारसायकलवरील दोन तरुण जागीच ठार झाले. गुरुवारी रात्री साडेअकराच्या सुमारास हा अपघात झाला. दोन्ही मयत मिरजगाव येथील आहेत.बेलगाव चौकातील भुईकाट्यावरून ऊस वाढ्याचे वजन करून हा ट्रॅक्टर ट्रेलरसह मिरजगावकडे येत होता. यावेळी नगरकडून मिरजगावकडे विना नंबरच्या मोटारसायकलवरून दत्ता शाम अंदुरे (वय २९) व सागर प्रकाश कळसकर (वय २३) येत असताना समोरील वाहनाच्या तीव्र प्रकाशाने पुढे चाललेला ट्रॅक्टर न दिसल्याने मोटारसायकल जोराने ट्रॅक्टरवर आदळली. यात दोघांच्या डोक्याला जोराचा मार लागल्याने दोघे जागीच ठार झाले. अपघातस्थळापासून हाकेच्या अंतरावर पोलीस दूरक्षेत्र आहे. पो. हे. कॉ. सुरेश बाबर, दत्ता कासार, नृसिंह शेलार, हृदय घोडके यांनी विस्कळीत झालेली वाहतूक सुरळीत करून मृतदेह शवविच्छेदनासाठी रात्री एकच्या दरम्यान कर्जतला पाठविले.दत्ता अंदुरे भांड्याचे व्यापारी शाम अंदुरे यांचा मुलगा आहे तर सागर कळसाईत पंढरपूर येथील टोलनाक्यावरील कर्मचारी प्रकाश कळसाईत यांचा मुलगा आहे. अपघातानंतर ट्रॅक्टर चालक घटनास्थळी ट्रॅक्टर सोडून पळून गेला. पोलिसांनी ट्रॅक्टर ताब्यात घेतला असून गुन्हा नोंदविण्याचे काम चालू होते. (वार्ताहर)शवविच्छेदनासाठी दहा तासांची प्रतीक्षामिरजगाव येथील प्राथमिक आरोग्य केंद्रात शवविच्छेदनाची सोय आहे, परंतु यासाठी आवश्यक डॉक्टर व कर्मचारी नाही. त्यामुळे अपघातानंतर कर्जतला मृतदेह पाठवावे लागतात. रात्री ११-३० ला झालेल्या अपघातानंतर शवविच्छेदनानंतर सकाळी ११ वाजता मृतदेह नातेवाईकांना ताब्यात मिळाला. नगर-सोलापूर महामार्गावर सतत अपघात घडतात. मात्र शवविच्छेदनासाठी नातेवाईकांना मोठी प्रतीक्षा करावी लागते.