लोकमत न्यूज नेटवर्क
भिंगार : अहमदनगर शहरालगत असलेल्या भिंगार येथील अमरधामध्ये अंत्यविधीच्या ठिकाणी असलेल्या पत्र्याच्या शेडच्या कामासंदर्भात भिंगार शहर राष्ट्रवादी सामाजिक न्याय विभागाने निवेदन दिले होते. त्यानंतर तत्काळ येथील पत्र्याच्या शेडचे काम हाती घेण्यात आले.
मागील अनेक वर्षांपासून भिंगारच्या अमरधाममधील अंत्यविधीच्या ठिकाणी असलेल्या शेडची पत्रे जीर्ण झाली होते. या शेडच्या पत्र्यांना मोठ-मोठे भगदाड पडले होते. सध्या पावसाचे दिवस असल्याने अंत्यविधीसाठी नागरिकांना याचा त्रास सहन करावा लागत होता.
ही बाब राष्ट्रवादीच्या सामाजिक न्याय विभागाचे सिद्धार्थ आढाव यांच्या लक्षात आली. त्यांनी शेडवरील पत्रे तत्काळ बदलून त्या ठिकाणी नवीन पत्रे टाकण्यात यावे, असे निवेदन छावणी मंडळ प्रशासनाला दिले. तद्नंतर सामाजिक न्याय विभागाच्यावतीने या कामाबाबत छावणी मंडळ प्रशासनाकडे पाठपुरावा करण्यात आला. या निवेदनाची दखल घेत छावणी मंडळ प्रशासनाने अमरधाममधील शेडच्या पत्र्याचे काम तत्काळ सुरू केले आहे.
---
फोटो आहे
भिंगारच्या अमरधाममध्ये सुरू असलेले पत्र्याच्या शेडचे काम.
100621\1425-img-20210610-wa0009.jpg
photo