केडगाव : कोरोनाच्या वाढत्या पार्श्वभूमीवर जिल्ह्यातील सर्व आठवडे बाजार बंद करण्याचे आदेश जिल्हाधिकारी यांनी दिले असतानाही हा आदेश झुगारत शनिवारी जेऊर येथे आठवडे बाजार भरला होता.
जेऊर पंचक्रोशीतील इतर गावांत बाजार भरत नसल्याने जेऊरचा आठवडे बाजार मोठ्या प्रमाणात भरत असतो. परंतु, कोरोना रुग्णांची वाढती संख्या लक्षात घेता खबरदारी म्हणून जिल्हाधिकाऱ्यांनी सर्व आठवडे बाजार बंद करण्याचे आदेश दिले होते. तरीही शनिवारी जेऊर येथे बाजार भरून मोठ्या प्रमाणात गर्दी जमली होती.
जेऊरचा आठवडे बाजार बंद ठेवण्याचा निर्णय २२ फेब्रुवारी रोजी झालेल्या ग्रामपंचायतीच्या मासिक सभेमध्ये घेण्यात आला होता. परंतु, त्या निर्णयाला काही सदस्यांनी तसेच व्यापाऱ्यांनी विरोध केल्याने बाजार पूर्ववत भरण्यास सुरुवात झाली होती. त्यानंतर जिल्ह्यात कोरोना रुग्णांची संख्या झपाट्याने वाढत असल्याने जिल्हाधिकारी यांनी जिल्ह्यातील सर्वच बाजार बंद ठेवण्याचा निर्णय घेतला होता.
जेऊरचा आठवडे बाजार गावातील सिना नदीपात्रात भरत असतो. बाजार बंदचा आदेश असल्याने बाजार सिना नदीपात्रात न भरता महावितरण कंपनीच्या चौकात भरला होता. बाजारात व्यापारी व नागरिकांनी मोठ्या प्रमाणात गर्दी केली होती.
बाजार भरल्याची माहिती एमआयडीसी पोलिसांना समजल्यानंतर पोलीस हेड कॉन्स्टेबल रमेश थोरवे व पोलीस नाईक दीपक गांगर्डे यांनी बाजारकरुंना समज देत तेथून पिटाळून लावले. परत गर्दी न करण्याची सक्त ताकीद दिली.
..............
नगर तालुक्यात कोरोना रुग्णांची संख्या झपाट्याने वाढत असल्याने प्रत्येक नागरिकांनी खबरदारी घेणे गरजेचे आहे. बाजार बंद असल्याने व्यापारी व शेतकऱ्यांची अडचण होत असली तरी कोरोनाच्या पार्श्वभूमीवर शेतकऱ्यांनी गर्दी न करता आपला भाजीपाला विक्री करावा.
-भीमराज मोकाटे, सरपंच, इमामपूर
..................
ग्रामीण भागात दिवसेंदिवस कोरोना रुग्णांची संख्या वाढत असल्याने नागरिकांनी मास्क, सॅनिटायझर व सामाजिक आंतर राखणे गरजेचे आहे. गर्दी होणार नाही याची काळजी घ्यावी.
-डॉ. योगेश कर्डिले, प्राथमिक आरोग्य केंद्र, जेऊर