कोपरगाव : संजीवनी ग्रुप ऑफ इन्स्टिट्यूट्स संचलित संजीवनी आर्टस्, काॅमर्स व सायन्स या वरिष्ठ महाविद्यालयाला सावित्रीबाई फुले पुणे विद्यापीठ व राज्य सरकारकडून सहा नवीन अभ्यासक्रमांना मान्यता मिळाली, अशी माहिती कार्याध्यक्ष नितीन कोल्हे यांनी दिली.
नव्या शैक्षणिक वर्षापासून ग्रामीण विद्यार्थ्यांना दर्जेदार व गुणवत्तापूर्ण उच्च शिक्षणाची सुविधा निर्माण होणार आहे. व्यावसायिक शिक्षणाबरोबरच विविध पारंपरिक शिक्षणाची दालने सुरू करण्यात आली आहेत. मायक्रोबायोलाॅजी, केमिस्ट्री, झुलाॅजी व बाॅटनी या विषयांतील एमएस्सी या पदव्युत्तर अभ्यासक्रमांना परवानगी मिळाली आहे. तसेच सायन्स अँड टेक्नाॅलाॅजी व मॅथेमॅटिक्स या विषयांतील बीएस्सीच्या अभ्यासक्रमांना मान्यता मिळाली. सध्या महाविद्यालयात मायक्रोबायोलाॅजी, केमिस्ट्री, झुलाॅजी व बाॅटनी या विषयांतील बीएस्सी, बीकाॅम (इंग्रजी माध्यम), बीबीए आयबी, डीप्लोमा इन फाॅरीन ट्रेड असे अभ्यासक्रम शिकविले जातात.
संजीवनी सीनिअर काॅलेजमध्ये केवळ पुस्तकी शिक्षण न देता प्रात्यक्षिक व संशोधन कार्यावर भर दिला जातो. तसेच विद्यार्थ्यांच्या सर्वांगीण विकासासाठी विविध उपक्रम राबविले जातात. त्यामुळे येथे बहुआयामी विद्यार्थी घडत आहेत, असे कोल्हे यांनी म्हटले आहे.
------