अहमदनगर : महापालिकेच्या पथकांची आणि पोलिसांची कारवाई सुरू असल्याने नगर शहरात मास्कची विक्री वाढली आहे. शहरातील औषधांच्या दुकानावर आठ दिवसांपूर्वी १० ते १५ मास्क विकले जात होते. आता एका औषध दुकानातून २०० ते ३०० मास्क विकले जात आहेत. सॉनिटायझरला मात्र सध्या तरी कोणीच विचारत नसल्याची स्थिती आहे.
गत आठवड्यात मुख्यमंत्री उद्धव ठाकरे यांनी राज्यात कोरोनाचे रुग्ण वाढत असून, लोकांनी नियमांचे पालन करावे, असे आवाहन केले. दुसऱ्या दिवशी जिल्हाधिकाऱ्यांनी यंत्रणेचा आढावा घेऊन नियमांची अंमलबजावणी करण्याचा आदेश दिला. २३ फेब्रुवारीपासून रात्रीच्या संचारबंदीची अंमलबजावणी सुरू झाली. त्यानंतर मास्क न वापरणाऱ्याविरुद्ध कारवाईचा आदेश दिला.
सध्या नगर शहरात महापालिकेची पथके फिरत आहेत. प्रत्येक दुकानात, कार्यालयात मास्क वापरला जात आहे का, याची तपासणी केली जात आहे. तसेच रस्त्यावर फिरणाऱ्या नागरिकांवर पोलिसांकडून दंडात्मक कारवाई केली जात आहे. त्यामुळे मास्क वापर वाढला आहे. शहरातील औषध दुकानांवर त्यामुळेच मास्क खरेदीसाठी ग्राहक वाढले आहेत.
---------
दुकान आधीची विक्री सध्याची विक्री
जुने शहर दुकान १० ते १५ मास्क १०० मास्क
बालिकाश्रम रोड दुकान १० मास्क १०० ते १५० मास्क
सावेडीतील दुकान १० ते १५ मास्क २५० ते ३०० मास्क
------------
मास्कची किंमत
कापडी मास्क- १० ते २० रुपये
एन-९५ मास्क- २० ते २५ रुपये
डिस्पोजल मास्क- २ ते ३ रुपये
-----------------
कोरोनाचा प्रादुर्भाव ओसरल्यानंतर दररोज दुकानामधून १० ते १५ मास्कची विक्री होत होती. ती आता १०० ते २०० पर्यंत गेली आहे. आधी कोणी फारसे मास्क विचारत नव्हते. शहरात कारवाई सुरू झाल्यानंतर मास्कला मागणी वाढली आहे.
-रिनुल गवळी, औषध विक्रेते
----------------
कारवाई सुरू असल्याने मास्कला मागणी वाढली आहे; मात्र सॉनिटायझरबाबत अद्याप मागणी कमीच आहे. सरकारी, खासगी कार्यालयांमध्ये सॅनिटायझरचा वापर वाढला आहे. कार्यालयांसाठी किंवा कुटुंबासाठी डिस्पोजल मास्कला जास्त मागणी आहे. एन-९५ मास्कचीही किंमत आवाक्यात आहे.
-दत्ता गाडळकर, अध्यक्ष, केमिस्ट असोसिएशन
----------------
फोटो-२५ मास्क
नगर शहरात मास्क घेण्यासाठी नागरिक सरसावले आहेत.