याप्रकरणी एमआयडीसी व नगर पोलीस ठाण्यात गुन्हे दाखल आहेत. शहरातील पाइपलाइन रोडवरील प्रियदर्शनी हॉटेलजवळ ८ जानेवारी रोजी रात्री गणेश सुजाण दास हा तरुण मित्रांसमवेत पायी जात होता. याचवेळी मोटारसायकलवरून आलेल्या पाच जणांनी कोयत्याचा धाक दाखवून मारहाण करत १७ हजार ५०० रुपयांची रोख रक्कम व मोबाइल हिसकावून नेला. याप्रकरणी गणेश दास याने दिलेल्या फिर्यादीवरून अज्ञात चोरट्यांविरोधात गुन्हा दाखल करण्यात आला आहे. या घटनेनंतर तोफखाना पोलीस स्टेशनचे उपनिरीक्षक समाधान सोळुंके यांच्या पथकाने शोध घेतला तेव्हा पाइपलाइन रोडवर निंबळक परिसरात लुटमार करणारी टोळी एकच असल्याचे समोर आले आहे.
ट्रकचालकांसह कारचालकांना लुटले
लुटारूंच्या टोळीने रात्री पाइपलाइन रोडवर लुटमार केल्यानंतर सकाळी सात ते साडेआठ वाजेच्या सुमारास निंबळक बायपास परिसरात दोन ट्रकचालकांसह एका कारचालकाला मारहाण करून त्यांच्याकडील मुद्देमाल चोरून नेला. याप्रकरणी तोफखाना व एमआयडीसी पोलीस ठाण्यात गुन्हे दाखल आहेत.
पाच मिनिटांत लूट करून होतात पसार
नगर परिसरात फिरणारी लुटारूंची टोळी अचानक पादचारी व वाहनचालकांवर हल्ला करते. हत्यारांचा धाक तसेच मारहाण करून मिळेल तो मुद्देमाल हिसकावून पसार होतात. अवघ्या पाच मिनिटांत हे कृत्य करतात. त्यामुळे ज्यांच्यावर हल्ला झाला आहे त्यांना काही समजण्याआधीच लुटारू मोटारसायकलवरून धूमस्टाइलने पसार होत आहेत. पोलिसांनी लुटारूंचा बंदोबस्त करण्याची मागणी प्रवाशांतून होत आहे.