नेवासा पोलीस ठाण्याच्या हद्दीत मागील चार महिन्यांपासून ठिकठिकाणी चोऱ्या, घरफोड्या, महामार्गावर रस्तालूट, दरोडे यासारखे गंभीर गुन्हे दाखल होते. सदर गुन्ह्यातील सराईत गुन्हेगारांना पोलीस निरीक्षक विजय करे यांच्या तपास पथकाने जेरबंद केले.
यामध्ये आतिश सूरज पवार (रा. प्रवरासंगम, ता. नेवासा), मुन्ना ऊर्फ रोहित गोडाजी चव्हाण (रा. अशोकनगर, ता. श्रीरामपूर), ज्ञानेश्वर रावसाहेब पिंपळे (रा. जुने कायगाव, ता. गंगापूर), करण ऊर्फ दादू भीमा पवार (रा. हरेगाव, ता. श्रीरामपूर) व एक अल्पवयीन अशा पाच गुन्हेगारांना अटक करण्यात आली असून, तीन आरोपी फरार आहेत. अटक केलेल्या आरोपींकडून आठ गुन्ह्यांची उकल झाली असून, यामध्ये
तालुक्यातील शिरसगाव येथे श्रेयस मेडिकल चोरी, खडका फाटा येथे हॉटेल औदुंबरसमोर महामार्गावर ट्रकचालकास अडवून केलेली रस्तालूट, सलाबतपूर येथील साहिल कलेक्शनमधील झालेली चोरी, जेऊर हैबती, भेंडा बुद्रुक येथील चोरी, नेवासा फाटा येथील बुलेट चोरी, माळीचिंचोरा येथे महामार्गावर ट्रकचालकाची लूट, बाभूळवेढा येथील घरफोडी अशा आठ गुन्ह्यांची कबुली आरोपींनी दिली आहे. आरोपींकडून बुलेटसह काही मुद्देमाल जप्त करण्यात आला आहे.
नेवासा पोलीस ठाण्याचे निरीक्षक विजय करे यांना माहिती मिळताच त्यांच्या पथकातील सहायक पोलीस निरीक्षक विजय ठाकूर, पोलीस उपनिरीक्षक भरत दाते, पोलीस उपनिरीक्षक प्रदीप शेवाळे, पोलीस उपनिरीक्षक समाधान भाटेवाल, पोलीस नाईक महेश कचे, पोलीस नाईक राहुल यादव, पोलीस नाईक सुहास गायकवाड, पोलीस नाईक जयवंत तोडमल, पोलीस नाईक संदीप गायकवाड, पोलीस कॉन्स्टेबल वसीम इनामदार, गणेश इथापे, भागवत शिंदे यांनी ही कामगिरी पार पाडली.
या गुन्ह्यातील आरोपींवर श्रीरामपूर, कोपरगाव, संगमनेर, विरगाव, बारामती, गंगापूर, वाळुंज, पाचोड, कन्नड, औरंगाबाद, नाशिक, शेवगाव, अहमदनगर, शिर्डी येथील पोलीस ठाण्यांत ३८ गंभीर गुन्ह्यांची नोंद आहे.