पारनेर : नगरपंचायत निवडणुकीबाबत भूमिका ठरविण्यासाठी भाजपची शनिवारी (दि.२७) पारनेर येथे बैठक होणार आहे. नगरपंचायत निवडणुकीबाबत भाजप काय निर्णय घेते, याची उत्सुकता कार्यकर्त्यांमध्ये आहे.
नगरपंचायतीची मतदारयादी सोमवारी (दि. १ मार्च) प्रसिद्ध होणार असून निवडणूकही काही दिवसांत जाहीर होण्याची शक्यता आहे. यासाठी अनेक उमेदवारांनी तयारी सुरू केली आहे. भाजपचे तत्कालीन तालुकाध्यक्ष विश्वनाथ कोरडे यांनी मागील नगरपंचायत निवडणुकीमध्ये पक्षाचे उमेदवार उतरवून शिवसेनेचे तत्कालीन आमदार विजय औटी यांना आव्हान दिले होते. पालकमंत्री प्रा. राम शिंदे व विजय औटी यांच्या राजकीय भाषणांची जुगलबंदी त्यावेळी चांगलीच रंगली होती. भाजपला त्यावेळी अपेक्षित यश मिळाले नाही. मात्र, सहयोगी म्हणून पाठिंबा दिलेले उमेदवार त्यावेळी निवडून आले होते.
सध्या वसंत चेडे भाजपचे पारनेर तालुकाध्यक्ष आहेत. त्यांच्या पारनेर शहरातील नगरपंचायतीची निवडणूक भाजप कशा पद्धतीने लढविणार हा इतर राजकीय पक्षांमध्ये मोठा उत्सुकतेचा विषय आहे. शनिवारी भाजपचे नगरपंचायत प्रभारी माजी आमदार शिवाजी कर्डिले, जिल्हाध्यक्ष अरुण मुंडे, तालुकाध्यक्ष वसंत चेडे यांच्या उपस्थितीमध्ये पारनेर येथे बैठक होणार असल्याची माहिती आहे.
....
बैठकीतील उपस्थितांकडे लक्ष...
पारनेर शहरात शनिवारी भाजपची बैठक होणार असून यामध्ये उमेदवारी मागण्यासाठी कोणकोण इच्छुक उपस्थित राहणार, हे पाहणेही महत्त्वाचे ठरणार आहे. त्यामुळे बैठकीतील उपस्थितांकडे खास लक्ष असणार आहे.