लोकमत न्यूज नेटवर्क
सांगली : ग्लास एज व त्याच्या आधारावर होणाऱ्या ओपन सेल टी.व्ही. पॅनेलचे उत्पादन विस्कळीत झाल्यामुळे भारतीय टी.व्ही. उत्पादक कंपन्यांना दरवाढीचा शॉक बसला आहे. दिवसेंदिवस पॅनेलचे दर वाढत असल्याने भारतीय कंपन्यांची चिंता वाढली आहे. गेल्या दोन महिन्यांत यामध्ये ५० टक्के दरवाढीचा फटका भारतीय कंपन्यांना बसला आहे. पुढील वर्षीसुद्धा ही समस्या कायम राहणार आहे.
ओपन सेल पॅनेलचे उत्पादन केवळ चीन, दक्षिण कोरिया आणि तैवान या देशांमध्येच होते. एलईडी टीव्ही पॅनेलमधील ७० ते ८० टक्के उलाढाल चायनीज कंपन्यांकडून होते. त्यामुळे पॅनेलबाबत जगातील उद्योजक चीनवर अवलंबून आहेत. भारतातही चीनच्या पॅनलचा वापर अधिक होतो.
ग्लास एज हा एक पॅनलचा थर आहे. त्याचे उत्पादन करणाऱ्या चीनमधील दोन्ही कंपन्यांच्या मशिनरी गेल्या काही महिन्यांपासून बंद आहेत. त्यामुळे पॅनल तयार करणाऱ्या कंपन्यांचे उत्पादन विस्कळीत झाले. मागणीच्या तुलनेत तूट वाढत गेल्याने बाजारातील पॅनलचे दर वाढत आहेत. दोन महिन्यांपूर्वी पॅनलचा दर ३८ डॉलर इतका होता, तो आता ७८ वर गेला आहे. म्हणजेच तो दुप्पट झाला आहे.
भारतात ऑक्टोबरपासून पॅनलवर पुन्हा पाच टक्के आयात शुल्क लागू झाले आहे. त्यामुळे दरवाढ झाली होती. जीएसटी, आयात शुल्क, शिपिंग शुल्क यांचा विचार करता हे पॅनल भारतात टी.व्ही. उत्पादक कंपन्यांकडे येईपर्यंत महागडे होत आहेत.
सध्या पॅनलच्या वाढत्या दरामुळे टी.व्ही.च्या किमती वाढत आहेत. तरीही प्रमुख उत्पादक कंपन्यांनी नफ्याचे प्रमाण कमी करून दरवाढ सोसली आहे. तरीही ही तूट यापुढे सहन करणे उत्पादकांना शक्य नसल्याने टी.व्ही.च्या किमती वाढणार आहेत.
चौकट
शिपिंगच्या दरवाढीचा दणका
सध्या शिपिंगच्या दरवाढीचा दणका टी.व्ही.च्या कच्च्या मालासही बसत आहे. ज्या मार्गावर पूर्वी प्रतिकंटेनर एक हजार २०० डॉलर दर (सी फ्रेट) होता, तो आता तीन हजार ८०० पर्यंत वाढला आहे. त्यामुळे पॅनलच्या दरात तितकी वाढ होत आहे.
कोट
टी.व्ही.च्या ओपन सेल पॅनलमध्ये अनपेक्षित मोठी दरवाढ झाली आहे. जुलै २०२१ पर्यंत दरवाढीचा आलेख वाढतच जाणार आहे. सर्वाधिक चालणाऱ्या ३२ इंची टी.व्ही. पॅनलचा १०० टक्के तुटवडा आहे. त्यामुळे उत्पादकांसमोरील अडचणी वाढल्या आहेत.
- घनश्याम आवटे, टी.व्ही. उत्पादक