बोरगावमध्ये आजपासून यात्रेचे आयोजन

विविध कार्यक्रम : हेमाडपंथी बलभीम देवाचे मंदिर

बोरगाव : बोरगाव (ता. वाळवा) येथील बलभीम देवाची यात्रा दि. २४ आॅक्टोबर ते २६ आॅक्टोबर अशी तीन दिवस चालणार असून, यात्रेचा मुख्य दिवस २६ आॅक्टोबर या दिवशी खारा नैवेद्य व कुस्त्यांचे जंगी मैदान दुपारी ४ वाजता होणार आहे. याबरोबरच चार दिवस करमणुकीचे कार्यक्रम होणार आहे. त्यानिमित्त घेतलेला हा आढावा....उत्तरवाहिनी कृष्णा नदीच्या तीरावर वसलेले बोरच्या बनातील गाव म्हणजेच बोरगाव. इंग्रज राजवटीच्या काळात खंडोबा बल्लाळ चिटणीस या वतनदाराला हे गाव वतन दिले. एका रात्री बल्लाळांच्या स्वप्नात बलभीम येऊन, नदीपात्रात श्री हनुमान मूर्ती असल्याचा दृष्टांत झाला. सेवेकऱ्यांच्याकरवी मूर्तीचा शोध नदीपात्रात घेतला असता, अमृतेश्वराजवळ पूर्वाभिमुखी सात फूट उंचीची जांबू माळी वध रुपातील मूर्ती सापडली. ही मूर्ती दगडी गाड्यातून गावाकडे घेऊन जात असताना गावाच्या वेशीत तो गाडा थांबला. गाडा जाग्यावरून हलेनाच. हे लक्षात येताच वतनदार व गावकऱ्यांच्या संगनमताने या मूर्तीची प्रतिष्ठापना करण्याचे ठरले. १८ व्या शकतात मूर्तीची प्रतिष्ठापना करून १८५६ मध्ये हेमाडपंथी ७५ फूट उंच व ३५ फूट रुंदीचे दगडी मंदिर उभारण्यात आले. हा दिवस दीपावली पाडव्याचा म्हणजे नरकचतुर्दशीचा असल्याने या देवाची यात्रा दीपावलीदिवशी भरते. गंधलेपातील श्रीची पूजा जांबू माळी वधरुपात उद्या, २४ आॅक्टोबर रोजी बांधली जाते. त्याचदिवशी १२५ ते १५0 पणत्यांनी देऊळ सजविले जाते. मंदिरावर आकर्षक विद्युत रोषणाई करण्यात आली असून, या दिवशी गावातील अबाल महिला, पुरुष, मोहरवाशिणी सायंकाळी पूजेसाठी दर्शनासाठी गर्दी करतात. रात्री १0 वाजता फटाक्यांची आतषबाजी नामांकित बॅन्ड कंपनी, सनई चौघडा, वाद्ये आदी सादर केली जातात. पालखी मध्यरात्री किचात जाते. दसरा चौकात गावातील इतर देवांच्या पालख्यांची भेट होते.या मंदिरातील पालखीचा मान खंडोबल्लाळ चिटणीस वंशजांना दिला जातो, तर पूजेच्या सेवेचा मान हनमंत गुरव व मदन गुरव यांचा आहे. तसेच पालखीचा मान पोलीस पाटील बी. एस. पाटील, जाधव, चौधरी, पवार, लोहार, सुतार, भोई यांना देण्यात आला आहे.यावर्षी करमणुकीच्या कार्यक्रमाचे आयोजन करण्यात आले आहे. २४ आॅक्टोबरला मर्दानी खेळ, सांस्कृतिक कार्यक्रम, ६ ते ९, २५ रोजी रात्री नऊ वाजता तुफान विनोदी नाटक आम्ही नाटकवाले. रविवार २६ आॅक्टोबर रोजी दुपारी निकाली कुस्त्यांचे मैदान, यात १00 रुपयांपासून १ लाखापर्यंत कुस्त्या होणार आहेत. रात्रौ ९ वाजता कमलाकर कराडकर व वनिता कराडकर यांचा लोकनाट्य तमाशा आयोजित केला आहे. तसेच खास महिलांसाठी दि. २८ रोजी रात्री ९ वाजता लावण्यवती लता जाधव, पूजा पाटील व पूनम कुडाळकर यांचा ‘तीन तारका’ हा बहारदार लावण्यांचा कार्यक्रम होणार आहे. (वार्ताहर)