एका पावसाने चिखलात रुतली गुंठेवारी निधी पडून

सांगली, मिरज आणि कुपवाडमधील गुंठेवारी नागरिकांचे हाल; कामे झाली ठप्प

सांगली : गुडघाभर चिखल, खड्ड्यांमध्ये साचलेले पाणी आणि उघड्या गटारींमुळे परिसरात पसरलेले सांडपाणी व दुर्गंधी यामुळे गुंठेवारीतील नागरिकांना एका पावसानेच हैराण केले. सांगली, मिरजेतील गुंठेवारी भागात गुडघाभर चिखलात वाहने अडकून पडली असून नागरिकांना चालत जाणेही मुश्किल झाले आहे. एका पावसातच ही अवस्था झाल्याने पूर्ण पावसाळ्याची चिंता येथील नागरिकांना सतावत आहे. मंगळवारी झालेल्या मुसळधार पावसाने महापालिका क्षेत्रातील गुंठेवारी भागाची दैना उडाली. ड्रेनेज तसेच मोबाईलच्या भूमिगत वाहिन्यांसाठी केलेली खुदाई, गेल्या अनेक वर्षात या भागात न पडलेला मुरुम, उघड्या गटारी या सर्व कारणांमुळे गुंठेवारीतील नागरिकांचा सध्या वनवास सुरु आहे. गेल्या अनेक वर्षांपासूनची ही स्थिती अजूनही बदललेली नाही. गुंठेवारी भागातील विकासकामे ठप्प आहेत. आधीच गैरसुविधांच्या विळख्यात अडकलेल्या गुंठेवारीत खड्डेखुदाईने भर टाकली आणि बहुतांश गुंठेवारीचा भाग दलदलीत रुतला. मंगळवारच्या पावसाचा हा एक भयावह ट्रेलर होता. त्यामुळे प्रत्यक्ष पावसाळ्यातील स्थितीच्या विचाराने नागरिकांमधून भीती व्यक्त केली जात आहे. शहरात शंभर फुटी रस्त्याच्या दक्षिण बाजूस गुंठेवारीचा मोठा पट्टा आहे. अनेक नगरे, कॉलन्या गुंठेवारीत वसल्या आहेत. विस्तारित भाग म्हणून ओळखल्या जाणार्‍या शहराच्या चारही बाजूंच्या वस्त्याही गुंठेवारीत येतात. बहुतांश वस्त्यांमध्ये मुरुमाचे रस्ते, उघड्या गटारी आहेत. त्यामुळे पाऊस पडला की या भागात पावसाचे पाणी व सांडपाणी मोठ्या प्रमाणावर साचून राहते. अनेक घरे सांडपाण्याने वेढली जातात. गेल्या अनेक वर्षांचे हे चित्र अजूनही कायम आहे. काही गुंठेवारी भागात डांबरी रस्ते झाले असले तरी, बहुतांश भाग अजूनही मुरुमातच आहे. अनेक वर्षापासून काही गुंठेवारी भागात मुरुमही पडला नाही. त्यामुळे पावसात हे सर्व भाग चिखलमय होतात. त्यातच सांडपाणी साचून राहिल्याने नागरी आरोग्यही धोक्यात येते. (प्रतिनिधी)