पुणे : स्वाइन फ्लूमुळे शहरात शनिवारी आणखी एका महिलेचा मृत्यू झाला. त्यामुळे या नव्या वर्षातील स्वाइन फ्लूच्या बळींची संख्या ४ वर पोहोचली आहे. ही महिला अहमदनगरमधील श्रीगोंदा तालुक्यातील रहिवासी आहे. दरम्यान, शहरात स्वाइन फ्लूची तीव्रता वाढली असून, लागण झालेल्या ५ जणांची प्रकृती चिंताजनक आहे. त्यांना व्हेंटिलेटवर ठेवण्यात आले आहे.संबंधित महिलेवर खासगी रुग्णालयात उपचार सुरू होते. रुग्णालयात दाखल केल्यानंतर २३ जानेवारीला त्यांच्या घशातील द्रवाचे नमुने तपासणीसाठी घेण्यात आले होते. शनिवारी सकाळी आलेल्या तपासणी अहवालात त्यांना स्वाइन फ्लू झाल्याचे निष्पन्न झाले होते. स्वाइन फ्लूबरोबर त्यांना डेंगीची लागण झाल्याचेही निष्पन्न झाले होते. त्यामुळे त्यांची प्रकृती खालावली होती आणि उपचार सुरू असताना आज दुपारी सव्वातीनच्या सुमारास या महिलेचा मृत्यू झाला. थंड वातावरण एच१ एन१ विषाणूंच्या वाढीसाठी पोषक असते. गेले आठ महिने हे वातावरण नसल्याने या काळात एकही रुग्ण सापडला नव्हता. मात्र, शहरात थंडी वाढल्यानंतर स्वाइन फ्लूचे रुग्ण आढळत आहेत. हवामान बदलामुळे सर्दी-खोकला, घसादुखी, ताप आदी व्हायरल इन्फेक्शनमध्येही वाढ झाली आहे. (प्रतिनिधी)दिवसभरात ५३३ जणांची तपासणी करण्यात आली. यापैकी ४५ संशयितांना टॅमीफ्लू औषधे देण्यात आली. दिवसभरात स्वाइन फ्लूचे ३ नवे रुग्ण सापडले आहेत. यामुळे या महिन्यातील स्वाइन फ्लूच्या रुग्णांची संख्या १४ वर पोहोचली आहे. या महिन्यात स्वाइन फ्लूने ४ जणांचा मृत्यू झाला. त्यापैैकी तिघे जण पुणे शहराबाहेरील होते.
नगरमधील महिलेचा स्वाइन फ्लूने पुण्यात मृत्यू
By admin | Updated: January 25, 2015 00:16 IST