निर्भया प्रकरणातील दोषीचा तुरुंगात आत्महत्येचा प्रयत्न

२०१२मधील निर्भया सामूहिक बलात्कार प्रकरणातील दोषी विनय शर्मा याने येथील तिहार कारागृहात बुधवारी रात्री गळफास घेऊन आत्महत्येचा प्रयत्न केला.

नवी दिल्ली : २०१२मधील निर्भया सामूहिक बलात्कार प्रकरणातील दोषी विनय शर्मा याने येथील तिहार कारागृहात बुधवारी रात्री गळफास घेऊन आत्महत्येचा प्रयत्न केला. शर्मा टॉवेलने गळफास घेण्याचा प्रयत्न करीत असताना सोबतच्या कैैद्याला जाग आली. त्याने फास काढून तुरुंग प्रशासनाला घटनेची माहिती दिली. शर्माला दीनदयाल उपाध्याय रुग्णालयात दाखल करण्यात आले आहे. डॉक्टर त्याच्या प्रकृतीवर लक्ष ठेवून असून, तो वाचेल, असे पोलिसांनी सांगितले. गळफास घेण्याचा प्रयत्न करण्यापूर्वी त्याने गोळ्यांचे सेवन केले असण्याची शक्यता आहे, असे पोलिसांनी सांगितले. शर्माने आत्महत्येचा प्रयत्न का केला याचा दिल्ली पोलीस आणि तिहार कारागृह प्रशासन तपास करीत आहे. मार्च २०१३ मध्ये निर्भया प्रकरणातील एक आरोपी रामसिंग याने तिहारमधील आपल्या बराकीत छताला गळफास घेऊन आत्महत्या केली होती. तथापि, काहींनी हा हत्येचा प्रकार असल्याचा संशय व्यक्त केला होता. (लोकमत न्यूज नेटवर्क)