पुरूषोत्तम च्या धर्तीवर आता महापौर करंडक स्पर्धा मुख्यसभेत सर्वपक्षीय मान्यता

पुणे : महाविद्यालीय युवकांच्या कलागुणांना वाव देण्यासाठी सुरू झालेल्या पहिल्या वाहिल्या पुरूषोत्तम करंडक नाटय स्पर्धेच्या धर्तीवर महापालिकेकडूनही महापौर करंडक नाटय स्पर्धा सुरू करण्यात येणार आहे. त्यासाठीच्या प्रस्तावास मुख्यसभेत शुक्रवारी एकमताने मान्यता देण्यात आली असून या स्पर्धेच्या संयोजनाचे सर्व अधिकार महापौरांना देण्यात आले आहेत.
शहरात मोठया प्रमाणात महाविद्यालये आहेत. या मध्ये शेकडे विद्यार्थी शिक्षण घेत असून त्यांच्या कलागुणांना वाव देण्यासाठी तसेच त्यांना हक्काचे व्यासपीठ मिळवून देण्यासाठी महापालिकेच्या वतीने पुरूषोत्तमच्या धर्तीवर नाटय स्पर्धा सुरू करावी, तसेच त्यात संगीत, नृत्य आणि नाटय या विभागात युवकांच्या साह्याने विविध स्पर्धांचे आयोजन करावे याबाबतचा प्रस्ताव माजी स्थायी समिती अध्यक्ष बापूराव कर्णेगुरूजी आणि सभागृह नेते सुभाष जगताप यांनी दिला होता. मागील वर्षी डिसेंबर 2014 मध्ये स्थायी समितीने या प्रस्तावास मान्यता दिल्या नंतर आज झालेल्या मुख्यसभेत तो मान्यतेसाठी ठेवण्यात आला होता. त्यास सर्वपक्षीय नगरसेवकांनी एकमताने मान्यता दिली.
=========
पालिकेच्या नाटयगृहांचा होणार वापर
शहरात महापालिकेची सुमारे सहा ते सात लहान मोठी नाटयगृहे आहेत. त्यातील गणेशकला, बालगंधर्व तसेच यशवंतराव चव्हाण नाटयगृह तसेच लोकशाहीर अण्णाभाऊ साठे नाटयगृह वगळता इतर नाटयगृहांचा फारसा वापर होत नाही. त्यामुळे आता महापालिका प्रशासनाकडूनच ही स्पर्धा सुरू करण्यात येत असल्याने या नाटयगृहांचा वापर करता येणार असल्याचे महापालिका प्रशासनाकडून स्पष्ट करण्यात आले.
============================