नागपूर : रेल्वेगाडीत गस्त घालत असताना रेल्वे सुरक्षा दलाच्या जवानांच्या सतर्कतेमुळे २१.९३३ किलोग्रॅम गांजासह दोन महिलांना अटक करण्यात आली. ही कारवाई रेल्वेगाडी क्रमांक ०२८०५ विशाखापट्टनम-नवी दिल्ली एक्स्प्रेसमध्ये चंद्रपूर ते नागपूरदरम्यान करण्यात आली.
मिळालेल्या माहितीनुसार मध्य रेल्वे नागपूर विभागाचे वरिष्ठ विभागीय सुरक्षा आयुक्त आशुतोष पांडे यांच्या आदेशानुसार चंद्रपूर आरपीएफचे निरीक्षक एन.पी. सिंह यांच्या मार्गदर्शनाखाली आरक्षक प्रवीण कुमार गुर्जर, कृष्णकुमार मीना विशाखापट्टनम-नवी दिल्ली एक्स्प्रेसमध्ये चंद्रपूर ते नागपूरपर्यंत गस्त घालत होते. त्यांना एस २, बर्थ क्रमांक ४९ आणि ५२ वरून प्रवास करीत असलेल्या दोन महिलांवर संशय आला. त्यांची चौकशी केली असता गांजासारखा वास येत होता. गाडी नागपूर रेल्वेस्थानकाच्या प्लॅटफार्म क्रमांक १ वर आली असता उपनिरीक्षक सचिन दलाल आणि महिला कर्मचाऱ्यांनी दोन्ही महिलांना त्यांच्या ५ बॅगांसह खाली उतरविले. चौकशीत त्यांनी आपले नाव दीपा रानी कौशल किशोर (७१) रा. थैलिया, बहराईच, उत्तर प्रदेश आणि बिनोती विकास बर्मन (४५) रा. मंगलवाडी, जुना मालदा, प. बंगाल असे सांगितले. नायब तहसीलदार सुनील साळवे यांच्या समक्ष या महिलांच्या ताब्यातील पाचही बॅगची तपासणी केली असता त्यात २१.९३३ किलोग्रॅम गांजा आढळला. त्याची किंमत दोन लाख १९ हजार ३३० रुपये आहे. नागपूर आरपीएफ ठाण्याचे निरीक्षक आर. एल. मीना यांच्या निर्देशावरून जप्तीची कारवाई करण्यात आली.
...........