चकमकीत एक नक्षलवादी ठार

एटापल्ली तालुक्याच्या कसनसूर पोलीस ठाण्यांतर्गत कोटमी जंगल परिसरात शनिवारी सकाळी ८ वाजता पोलीस व नक्षलवाद्यांमध्ये चकमक उडाली. या चकमकीत एक नक्षलवादी ठार झाला आहे.

सी-६० पथकाची कारवाई : डीव्हीसी सदस्यांच्या बैठकीदरम्यान चकमकएटापल्ली (गडचिरोली) : एटापल्ली तालुक्याच्या कसनसूर पोलीस ठाण्यांतर्गत कोटमी जंगल परिसरात शनिवारी सकाळी ८ वाजता पोलीस व नक्षलवाद्यांमध्ये चकमक उडाली. या चकमकीत एक नक्षलवादी ठार झाला आहे. त्याचा मृतदेह पोलिसांनी हस्तगत केला आहे. या ठिकाणी वरिष्ठ कॅडरच्या नक्षल्यांची बैठक सुरू असल्याची माहिती पोलिसांनी दिली आहे.एटापल्ली तालुक्याच्या कोटमी जंगल परिसरात गर्देपल्ली ते मंडोली या दरम्यान गडचिरोली पोलिसांचे सी-६० पथक पहाटेपासून नक्षलविरोधी शोध मोहीम राबवित असताना सकाळी ८ वाजताच्या सुमारास नक्षलवाद्यांनी पोलिसांच्या दिशेने अंदाधूंद गोळीबार सुरू केला. यावेळी पोलिसांनीही प्रत्युत्तरादाखल गोळीबार केला. अर्धा तास प्रचंड चकमक चालली. या चकमकीत एक पुरूष नक्षलवादी ठार झाला. त्याचा मृतदेह पोलिसांनी घटनास्थळावरून ताब्यात घेतला आहे. या चकमकीत आणखी काही नक्षलवादी ठार झाल्याचा पोलिसांचा अंदाज आहे. चकमकीनंतर घटनास्थळावर सर्चिंग आॅपरेशन करण्यात आले. यात एक पिस्तुल, तीन क्लेमोर, तीन गावठी पिस्तुल, लिक्वीड एक्सप्लोसीव, एम. एम. राऊंड, बोल्ट, वायर, कॅमेरा, १५ पिट्टू व नक्षल पुस्तके पोलिसांनी जप्त केले आहे. या जंगलात नक्षलवाद्यांचा प्रशिक्षण शिबिर सुरू होते. वरिष्ठ नक्षल कॅडरची बैठकही या दरम्यान चालू होती. या शिबिरात विभागीय समिती सदस्य जोगन्ना व नर्मदा अक्का यांच्यावर उपचार सुरू होता, अशी माहिती पोलिसांनी दिली आहे. कसनसूर नक्षल दलमच्या ३५ ते ४० नक्षलवाद्यांचा या घटनेत सहभाग असल्याचा अंदाज पोलिसांनी वर्तविला आहे. एटापल्लीचे उपविभागीय पोलीस अधिकारी दत्ता नलावडे यांच्या मार्गदर्शनात नक्षलविरोधी शोध मोहीम तीव्र करण्यात आली आहे. एटापल्ली तालुक्यात गेल्या एक वर्षात नक्षल घटनांमध्ये मोठ्या प्रमाणावर वाढ झाली आहे. (तालुका प्रतिनिधी)