आरटीओ : आले ‘हेडलाईट एनालायझर यंत्र’
नागपूर : वाढत्या रस्ते अपघातांची कारणे विविध आहेत. यातील महत्त्वाचा भाग म्हणजे वाहनाचा फिटनेस हा उत्तम असल्यास बहुतांश वेळा अपघात टाळता येतो; मात्र वाहनांना फिटनेस सर्टीफिकेट देणार्‍या प्रादेशिक परिवहन कार्यालयांमध्ये (आरटीओ) फिटनेस घेण्यासाठी पायाभूत सुविधाच नाही. चाचण्यांचा फक्त फार्स केला जात होता. उच्च न्यायालयाचे दणक्याने आता नागपूरचे तीनही आरटीओचा फिटनेस सुधारणार आहे. या कार्यालयांना शासनाकडून नुकतेच ‘हेडलाईट एनलायझर यंत्र’ मिळाले आहे. या यंत्रामुळे वाहनांना आणखी कठीण परीक्षेला समोर जावे लागणार आहे. अवजड व व्यावसायिक वाहन रस्त्यावर धावण्यास खरोखरच सक्षम आहे का, त्याची निकषाप्रमाणे तपासणी करून उपप्रादेशिक परिवहन अधिकार्‍यांकडून वाहन फिटनेस प्रमाणपत्र दिले जाते. यासाठी काही नियम आहेत. त्याअंतर्गत वाहनाची प्रत्यक्ष चाचणी आरटीओ कार्यालयात मोटार वाहन निरीक्षकाकडूनच करणे बंधनकारक आहे. वाहनांचे ब्रेक कसे किंवा किती क्षमतेचे आहे, दिव्याची प्रखरता किती व कशा पद्धतीची आहे. स्वतंत्र ट्रकवर संबंधित वाहन नेमके चालते कसे, याची याअंतर्गत तपासणी होणे गरजेचे आहे. परंतु या नियमानुसार योग्य ठोकताळ्यांनी वाहनांची तपासणी करण्यासाठी कार्यालयात योग्य यंत्रणाच नाही. हा मुद्दा एका नागरिकाने समोर आणला. तो न्यायालयापुढे मांडला. न्यायालयाने याची दखल घेऊन अशी यंत्रणा नसलेल्या आरटीओ कार्यालयाची माहिती मागविली. यात अनेक कार्यालयांमध्ये दोष आढळून आले. मात्र, उच्च न्यायालयाचे खरमरीत आदेश आल्याने आता आरटीओमध्ये सुधारणा सुरू झाली आहे. विशेषत: नागपूर आरटीओ कार्यालयात वाहनाच्या ब्रेक तपासणीसाठी वाडी मार्गावर विशेष सोय करण्यात आली आहे. याशिवाय आज सोमवारी हेडलाईट तपासणीसाठी आठ ‘हेडलाईट एनलायझर यंत्र’ मिळाले आहेत. यातील हे चार यंत्र आरटीओ ग्रामीण, एक आरटीओ शहर, एक उपप्रादेशिक परिवहन कार्यालय पूर्व आणि उपप्रादेशिक परिवहन कार्यालय वर्धा यांना देण्यात येणार आहे. अवजड व व्यावसायिक वाहनाचे हेडलाईट प्रखर असतात. ते एका विशिष्ट पद्धतीत असावे असा नियम आहेत. परंतु याकडे विशेष लक्ष दिले जात नाही. अशा वाहनाचा प्रकाश समोरून येणार्‍या वाहनचालकाच्या डोळ्यावर पडल्यास त्याला काही वेळासाठी काहीच दिसत नाही. अशावेळी अपघाताची शक्यता अधिक राहते. आता हेच तपासण्यासाठी शासनाने आरटीओ कार्यालयांना ‘हेडलाईट एनलायझर यंत्र’ दिले आहे. (प्रतिनिधी)