कोल्हापूर : आम्ही लस घेतली, तुम्हीही घ्या, असे प्रत्यक्ष कृतीद्वारे सांगत ज्येष्ठ नागरिकांनी कोविड लस रांगा लावून बुधवारी टोचून घेतली. शहरासह जिल्ह्यातील १२० सरकारी केंद्रांवर गर्दीचे चित्र दिवसभर होते. यामुळे कोविड लसीकरणाच्या पहिल्या दोन टप्प्यांत अनुत्साह अनुभवणाऱ्या लसीकरण यंत्रणेची तिसऱ्या टप्प्यात मात्र पहिल्याच दिवसापासून मरगळ झटकली गेली आहे. चांगला प्रतिसाद मिळत असल्याने आरोग्य यंत्रणाही वेगाने कामाला लागली आहे.
जिल्ह्यातील ६० वर्षांवरील सर्व ज्येष्ठ नागरिक आणि ४५ ते ६० या वगोगटातील व्याधीग्रस्त हा तिसरा टप्पा निश्चित करून लसीकरणास सुरुवात झाली. जिल्हाधिकाऱ्यांनी बैठक घेऊन सूचना दिल्यानंतर बुधवारपासून या लसीकरण मोहिमेने अधिक गती घेतली. गावोगावी आशा कर्मचाऱ्यांच्या मार्फत प्रबोधन करण्याबरोबरच ज्येष्ठांना केंद्रात घेऊन येण्यासाठीची यंत्रणाही आरोग्य विभागाने लावली आहे. नोंदणीसाठी स्वतंत्र वेबसाईट सुरू करण्यात आली असून, तेथे नोंदणी होईल, त्याप्रमाणे लस टोचून घेण्यासाठी बोलावले जात आहे.
स्वत:च नोंदणी करून घेत व्याधीग्रस्त व ज्येष्ठ नागरिक लसीकरण केंद्रावर रांगा लावून लस टोचून घेत आहेत. सरकारी दवाखान्यात मोफत, तर खासगी दवाखान्यात २५० रुपये घेऊन ही लस टोचली जात आहे. मोफत असल्याने सरकारी केंद्राबाहेर गर्दी दिसत आहे. लस घेतलेल्यांना पुन्हा २८ दिवसांनी दुसरी लस दिली जाणार असल्याने पूर्ण नाव, पत्ता, मोबाईल नंबरसह सर्व माहिती रजिस्टरमध्ये भरून घेतली जात होती. केंद्रावर एकाच वेळी गर्दी झाल्याने किमान अर्धा ते तासभर प्रतीक्षा करत बसावे लागत होते. केंद्रावर मास्क, सॅनिटायझरची दक्षता घेतली जात होती. लसीकरण झाल्यानंतर अर्धा तास विश्रांतीचीही सोय करण्यात आली होती.
चौकट ०१
काळजी घेण्याचे आवाहन
लस दिल्यानंतर अर्धा तास केंद्रावरच बसवून घेतले जात होते. परत जाताना रात्री ताप आलाच तर खाण्यासाठी म्हणून चार गोळ्याचे पाकीट दिले जात होते.
बॉक्स ०१
६० वर्षांवरील ज्येष्ठ नागरिक : ५ लाख ९ हजार
व्याधीग्रस्त नागरिक : १ लाख ५२ हजार
प्रतिक्रिया ०१
मी ६५ वर्षांची आहे. मुलांनी आधीच ऑनलाईन नोंदणी केली असल्याने अर्ध्या तासातच मला लस दिली. साधे इंजेक्शन दिल्याप्रमाणेच दुखले. काही त्रास जाणवला नाही.
सीमा सामानगडकर, महालक्ष्मीनगर
प्रतिक्रिया ०२
मी ७४ वर्षांचा आहे. शेजाऱ्याच्या मदतीने सीपीआरमध्ये लसीकरणासाठी आलो. लस टोचली. काही त्रास जाणवला नाही. न घाबरता सर्वांनीच लस टोचून घ्यावी.
मुरारजी शहा, शनिवार पेठ
प्रतिक्रिया ०३
फोटो : ०३०३२०२१-कोल-दीपा मगदूम लसीकरण
लसीकरणासाठी सामान्य जनतेने पुढे यावे यासाठी मी स्वत: महापालिकेच्या फिरंगाई रुग्णालयात जाऊन लस घेतली. कोरोनाच्या संसर्गातून वाचण्यासाठी लस हे कवच आहे.
दीपा मगदूम
माजी नगरसेविका कोल्हापूर.
फोटो: ०३०३२०२१-कोल- लसीकरण ०१
फोटो ओळ : सीपीआरमधील लसीकरण केंद्रावर सेल्फी पॉईंट तयार करण्यात आला आहे. लस टोचून घेतल्यानंतर ज्येष्ठ महिलेला सेल्फी पॉईंटवर फोटो काढून घेण्याचा मोह आवरला नाही.
(छाया : आदित्य वेल्हाळ)
फोटो: ०३०३२०२१-कोल- लसीकरण ०२
फोटो ओळ : सीपीआरमध्ये लस टोचून घेतल्यानंतर अर्धा तास सक्तीची विश्रांती घ्यावी लागत असल्याने अशाप्रकारे स्वतंत्र बेडची व्यवस्था करण्यात आली होती.
(छाया : आदित्य वेल्हाळ)