"तुझ्या कॅन्सरबद्दल कळलं अन् अक्षरशः थरथरायला झालं...", प्रिया मराठेबद्दल मराठी अभिनेत्रीची काळाजात चर्रर्र करणारी पोस्ट

"तुझा चेहरा डोळ्यासमोरून जातच नाहीये...",प्रिया मराठेच्या निधनानंतर मराठी अभिनेत्रीने व्यक्त केलं दु:ख

Priya Marathe Pasees Away: आपल्या अभिनयातून रसिक प्रेक्षकांची मनं जिंकणारी प्रतिभासंपन्न अभिनेत्री प्रिया मराठेचं काल रविवारी निधन झालं. गेल्या २ वर्षांपासून तिची कर्करोगाशी सुरु असलेली झुंज अखेर अपयशी ठरली. प्रिया मराठेच्या निधनाने कलाविश्वाला धक्का बसला आहे. अनेक मराठी कलाकार त्यांच्या भावना सोशल मीडियावर पोस्टच्या माध्यमातून शेअर करत आहेत.त्यात आता मराठी अभिनेत्री शुभांगी भुजबळने प्रिया मराठेच्या निधनानंतर भावुक करणारी पोस्ट शेअर केली आहे. 

प्रिया मराठेच्या आठवणीत अनेक मराठी कलाकारांनी भावनिक पोस्ट शेअर केल्या आहेत. त्यात आता मराठी अभिनेत्री शुभांगी भुजबळने "येऊ कशी कशी मी नांदायला" 
मालिकेदरम्यानची आठवण सांगत काळजात चर्र करणारी पोस्ट लिहिली आहे. त्यामध्ये तिने म्हटलंय की, "प्रिया, बातमी कळल्यापासून तुझा चेहरा डोळ्यासमोरून जातच नाहीये. आपण पहिल्यांदा एकत्र काम केलं "येऊ कशी कशी मी नांदायला" आणि नंतर "तू भेटशी नव्याने" या मालिकेत. कायम हसून स्वागत करणारी, शांत, संयमी असंच तुला बघितलं.... थोडी ओळख झाल्यावर तुझ्या गप्पा आणि खळखळून हसणंही जवळून अनुभवलं. आवडलं तुझ्याबरोबर काम करणं. दोन्ही मालिकेत तुझे माझे सीन कधीच फारसे एकत्र नव्हते पण तरी "तू भेटशी नव्याने" च्या वेळी, आज तू पण आहे सेटवर कळलं की मी हमखास तुला किमान हॅलो करायला यायचे.... कारण छान वाटायचं तुला भेटून.पाच सहा दिवस सेटवर दिसली नाहीस म्हणून चौकशी केली तेव्हा तुझ्या कॅन्सर बद्दल कळलं आणि अक्षरशः थरथरायला झालं, संपूर्ण अंगातून कळी गेली, माझ्या आणि भक्तीच्या डोळ्यात पाणीच आलं. कळतच नव्हतं काय react करायचं ते. पण दुसऱ्या क्षणी वाटलं तू लढशील आणि परत लवकरच एका नव्या भूमिकेत दिसशील."

यानंतर पुढे अभिनेत्रीने प्रिया मराठेच्या आठवणी शेअर करत म्हटलंय, "प्रिया... एवढी वेगळी भूमिका स्वीकारशील असं वाटलंच नव्हतं... जी आम्हाला कधी बघायलाच नाही मिळणार.Thank you प्रिया जेवढा काळ भेटलीस त्या सगळ्याबद्दल चांगल्या आठवणी आहेत आणि तशीच कायम आठवणीत राहशील.येऊ कशी तशी मी नांदायला च्या वेळी जयगडच्या गणपती मंदिरात तुझे हे फोटो मी काढले होते. तुला पाठवले होते पण माझ्याकडेही जपून ठेवले होते.... कारण तू जशी गोड आहेस तशीच दिसते आहेस ह्या फोटोत. पण हे फोटो आज तुझ्या जाण्याच्या निमित्ताने शेअर करेन असं वाटलं नव्हतं.प्रिया कायम अशीच हसत रहा.अशा भावना अभिनेत्रीने या पोस्टद्वारे व्यक्त केल्या आहेत.