मराठमोळा रिल स्टार प्रथमेश कदमचं निधन; माय-लेकाची जोडी सोशल मीडियावर कायम चर्चेत

Prathamesh Kadam Death: मराठमोळा रिल स्टार आणि सोशल मीडिया इन्फ्लुएन्सर प्रथमेश कदमचं निधन झालं आहे. प्रथमेशच्या निधनाने त्याच्या असंख्य चाहत्यांना चांगलाच धक्का बसला आहे.

मराठमोळा रिल स्टार आणि सोशल मीडिया इन्फ्लुएन्सर प्रथमेश कदमचं निधन झालं आहे. प्रथमेशच्या निधनाने त्याच्या असंख्य चाहत्यांना चांगलाच धक्का बसला आहे. प्रथमेश गेल्या काही दिवसांपासून आजारी होता. आज त्याच्या मित्रांनी सोशल मीडियाच्या माध्यमातून ही दुःखद बातमी सर्वांना सांगितली आहे. प्रथमेश कदम आणि त्याची आई प्रज्ञा कदम यांचे रिल सोशल मीडियावर चांगलेच चर्चेत असतात. 

काही वर्षांपूर्वी प्रथमेशच्या वडिलांचं निधन झालं होतं. त्यानंतर प्रथमेशवर कुटुंबाची जबाबदारी आली. प्रथमेशने घराची जबाबदारी सांभाळलीच. याशिवाय या दुःखावर मात करत त्याच्या आईलाही धीर दिला होता. गेल्या अनेक वर्षांपासून प्रथमेश आणि त्याची आई सोशल मीडियावर रिल करत होते. त्यांचे व्हिडीओ नेटकऱ्यांच्या चांगलेच पसंतीस उतरत होते. इतकंच नव्हे मराठी कलाकारांनीही या माय-लेकाच्या व्हिडीओला चांगलीच पसंती दिली. प्रथमेशच्या निधनाचं नेमकं कारण अद्याप कळालं नाहीये. 

प्रथमेशचा मित्र तन्मय पाटेकरने इन्स्टाग्रामवर पोस्ट करुन लिहिलंय की, ''तू सदैव आठवणीत राहशील प्रथमेश, देवाघरी स्वतःची काळजी घे रे ! खूप आठवण येईल तुझी Miss You Bhai''. साधा, प्रेमळ स्वभाव आणि डान्सच्या टॅलेंटमुळे प्रथमेश कदमने अल्पावधीत सर्वांचं मन जिंकलं. आधी पती आणि आता मुलाचं छत्र हरपल्याने प्रथमेशच्या आईवर शोककळा पसरली आहे. प्रथमेशचे मित्र आणि चाहते या कठीण प्रसंगात प्रथमेशच्या आईच्या दुःखात सहभागी आहेत.