विद्युत मोटार चोरट्यांना पकडले

पूर्णा : तालुक्यातील गोदावरी नदीच्या काठावरील धनगर टाकळी शिवारात शेतकर्‍यांच्या विद्युत मोटारी चोरी झाल्या होत्या. ग्रामस्थांच्या सतर्कतेमुळे दोन चोरटे पकडण्यात चुडावा पोलिसांना यश आले आहे. या प्रकरणी दोन्ही चोरट्यांना पूर्णा न्यायालयाने पोलिस कोठडी सुनावली आहे. याविषयी अधिक माहिती अशी की, धनगर टाकळी, कलमुला, सोन्ना, पिंपळगाव, सारंगी यासह अन्य गावांमध्ये शेतकर्‍यांच्या विद्युत मोटारी गोदावरी नदीच्या काठावर आहेत. सदरील मोटारीद्वारे शेतीला पाणी देण्यात येते. या मोटारी चोरून त्यामधील तांब्याची तार विक्री करणार्‍या आरोपी शेख जावेद शेख हबीब, बालाजी श्यामराव बोराटे या दोघांना तांब्याची तार चोरून नेण्याचा प्रयत्न करीत असताना ग्रामस्थांनी पकडून चुडावा पोलिसांच्या हवाली केले. चुडावा पोलिसांनी रितसर गुन्हा दाखल करून न्यायालयात हजर केले असता पूर्णा न्यायालयाने दोन दिवसांची पोलिस कोठडी सुनावली. सदरील आरोपींनी १४ विद्युत मोटारींमधील तांब्याची तार चोरली होती. मुद्देमाल व चोरीसाठी वापरण्यात आलेली एम.एच.२६ झेड. ६६७७ ही दुचाकी जप्त केली. याप्रकरणी सहाय्यक पोलिस निरीक्षक नागोराव कपाळे यांच्या मार्गदर्शनाखाली पोलिस उपनिरीक्षक गुलाब राठोड, वारकरी, पंडित पवार, खेतरी, बरकुंटे, वाघमारे आदी तपास करीत आहेत. (वार्ताहर)