आष्टी : मागील काही दिवसापासून दररोज पेट्रोल, डिझेल दरवाढ सुरू आहे. या वाढत्या महागाईमुळे शेतकरी सर्वसामान्य नागरिकांचे कंबरडे मोडले आहे. अशातच केंद्रातील मोदी सरकारने पेट्रोल, डिझेल व घरगुती वापरातील गॅसची दरवाढ करून सर्वसामान्य जनतेचे आणखी जास्त हाल केले आहेत. त्यामुळे सोमवारी आष्टी तालुक्यात राष्ट्रवादी युवक काँग्रेसच्या वतीने केंद्र सरकारच्या विरोधात जोरदार नारेबाजी करुन पेट्रोल व्यावसायिकांना पेढे भरवून गांधीगिरी मार्गाने सरकारचा निषेध नोंदवून जनआक्रोश आंदोलन करण्यात आले.
यावेळी नायब तहसीलदार प्रदीप पांडुळे यांना निवेदन देण्यात आले. आंदोलनात राष्ट्रवादी काँग्रेसचे जिल्हा उपाध्यक्ष सतीश शिंदे,मनोज चौधरी,राष्ट्रवादी युवक काँग्रेस तालुका उपाध्यक्ष सुरेश पवार,युवक जिल्हा उपाध्यक्ष बाळासाहेब गर्जे,सरपंच महादेव आंधळे,हरिष सांगळे,शौकत पठाण,सरपंच महादेव कोंडे,उपसरपंच गणेश गर्जे,बाबासाहेब जगताप,संदीप जगदाळे,विकास शिंदे,बाबासाहेब पोकळे,सतीश औटे, विठ्ठल खाळे,नाजिम पठाण,आबासाहेब तांबे,शारुक तांबोळी,प्रवीण तोडकर,अनवर तांबोळी,राजू पठाण आदी कार्यकर्ते उपस्थित होते.
सरकारने जनतेला भूलविले
केंद्र सरकारने तत्काळ इंधनाचे व गॅस दरवाढ कमी न केल्यास अजून मोठ्या स्वरूपात तीव्र आंदोलन छेडण्यात येईल असा इशारा राष्ट्रवादी काँग्रेसचे जिल्हा उपाध्यक्ष सतीश शिंदे यांनी दिला. केंद्र सरकारने अच्छे दिन दाखवत पेट्रोल १०६ रुपयांवर तसेच खाद्यतेल,गॅस महाग केल्याने गरिबांना उपाशीपोटी मरण्याची वेळ येत आहे. उज्ज्वला गॅस ,व अनेक योजनांची फूस लावून भोळ्या भाबड्या जनतेची मने जिंकणाऱ्या केंद्र सरकारने याच जनतेला जगावे की मरावे या मनस्थितीत आणून ठेवल्याचे ते म्हणाले.
050721\img-20210705-wa0320_14.jpg